Umkhokheli weMDC-T uMnu Douglas Mwonzora uthi ibandla lakhe lizasebenza lohulumende weZanu PF kuzo zonke inhlelo ezijonge ukuthuthukisa impilo kazulu.
UMwonzora wethule amazwi la izolo emkhosini oqhutshwe nguMongameli Emmerson Mnangagwa eVictoria Falls owokusungula ngokusemthethweni ihlandla lesibili lokuhlatshwa kwabantu ijekiseni yeCoronavirus.
UMwonzora ubemenywe kulumbuthano nguMnangagwa kanye labanye abakhokheli bamabandla amancane ukuthi bazehlatshwa ndawonye laye lijekiseni.
Ekhuluma ngemva kokuphiwa ithuba nguMnangagwa ukuthi agqibe lumkhosi, uMwonzora ukhuthaze njalo abantu ukuthi bahlatshwe labo kungakhathalekile ukuthi ngabebandla liphi lezombusazwe.
Abebandla leMDC Alliance elikhokhelwa nguMnu Nelson Chamisa bathi ukuphiwa ithuba kukaMwonzora nguMnangagwa kuveza sobala ukuthi ibandla leMDC-T seliyingcenye yeZanu PF.
Kunsukwana ezedluleyo uMwonzora ubikwa etshele amalunga ephalamende akubandla lakhe ukuthi akusamelanga achothoze uMnangagwa kumbe ukumbiza ngamagama amabi. Sixoxe lesikhulumeli seMDC-T uMnu Witness Dube othi kungamanga ukuthi basebenza leZanu PF.
Lokhu sikudaba lunye, inkokheli yebandla leMDC Alliance yona ibingekho emcimbini wokuhlaba abantu ijekiseni ye covid 19 edolobheni le Victoria Falls.
Inkokheli yamabandla aphikisayo le, inengi ingekumanyano we POLAD ibiphakathi kwendizamtshina inye ebithwele uMongameli Emmerson Mnangagwa lenye inkokheli yebandla leZanu PF.
Eloba enkundleni ye Twitter, isikhulumeli sikaMongameli Mnangagwa, uMnu. George Charamba uthe inkokheli yamabandla wonke ezombusazwe bekumele ihambe ngoba ibinxusiwe.
Mpela amanye amabandlaathole incwadi zokumema kodwa ibandla leMDC Alliance lithi alizange lithole leyo ncwadi.
Sikhulume lomgcinisihlalo webandla leMDC Alliance esigabeni seMatabelaland North, uMnu. Prince Dubeko Sibanda.