amalinks wokungena

Breaking News

Izisebenzi Zikahulumende Zithi Sezizakuya Kabili Kuphela Emsebenzini Ngeviki


Piki le fotsholo ... izisebenzi zisemsebenzini.

Abomanyano wenhlanganiso ezimela izisebenzi zikahulumende we Zimbabwe Confederation of Public Sector Trade Unions (ZCPSTU ) ababesaziwa ngelokuthi APEX COUNCIL bathi amalunga abo akasanelisi ukuya emsebenzini nsukuzonke ngakho, bazoqala ukusebenza okwensuku ezimbili kuphela ngeviki kusukela ngoMvulo ozayo.

Lokhu kuvezwe ngabomanyano we ZCPSTU engcwadini yabo abayilobele unobhala wogatsha lwezisebenzi zikahulumende uAmbassador Jonathan Wutawunashe ngemva komhlangano oyenzwe izolo phansi kwedale le National Joint Negotiating Council ( NJNC ) ocine ungasaphumanga lalutho olubambekayo phakathi komqatshi lezisebenzi phezu kokuthi iholo lezisebenzi zikahulumende zingezelelwe ngesilinganiso esinganani.

Uhulumende ubikwa ezinikele ukungezelela iholo lezisebenzi zakhe gesilinganiso sokungamatshumi ayisikhombisa lanhlanu ekhulwini, 75 percent , eqala ngokubatholisa isilinganiso sokungamatshumi amabili lanhlanu, 25 percent, kuyonale inyanga kuthi isilinganiso sokungamatshumi amahlanu ekhulwini, 50 percent, ihlawulwe ngenyanga kaNhalngula

Kodwa abangene lumhlangano bemele izisebenzi zikahulumende bathi bafuna iholo labo libuyele kulokho eleliyikho khona ngenyanga kaMfumfu womnyaka ka 2018 lapho izisebenzi zazithola iholo elingaba ngamadola akweleMelika angamakhulu amahlanu, $500.

Umsekeli kanobhala we ZCPSTU uMnu. Gibson Mushangu ulandisa kabanzi ngalendaba yokuthi izisebenzi zikahulumende kazisanelisi ukuya emsebenzini malanga wonke ngoba imali eziyitholayo inganeli indleko zazo zansuku zonke ngoba imali eziyitholayo kayifiki kusilinganiso samadola eMelika angamakhulu amabili, $200, ngenyanga.

Uzulu wedolobha leHarare lakwezinye indawo zeliizwe lonke jikelele uthi lanxa kuzakuba buhlungu lapho, izisebenzi zikahulumende zingasanelisi ukuba semsebenzini sikhathi sonke, uvumelana lenyathelo elithethwe yi ZCPSTU.

Omunye wabo kunguMnu. Victor Tavengwa wasemzini weBudiriro 5 eHarare.

Kwasekelwa ngumnumzana Silas Mthombeni ( Not Real name ) wasemzini we Pumula South koBulawayo.

Amazwi kaMthombeni agcizelelwe nguMnu. Adwel Dube okhuthaza uhulumende ukuba alulungisise ngesiphangiphangi loludaba lweholo lezisebenzi.

Unobhala wenhlanganiso ye Zimbabwe Congress of Trade Unions - ZCTU uMnu. Japhet Moyo uthi akubamangalisi osekusenzakala ngoba kuyikho abavele behlezi bekukhuluma sonke isikhathi ukuthi zilungiswe indaba zeholo lezisebenzi.
Lumsakazo awusazange wathola okuvelela kwabogatsha lwezisebenzi zikahulumende njengoba unobhala wakhona uAmbassador Jonathan Wutawunashe ubelokhe engayiphenduli imibuzo ayithunyelweyo engasabeli locingo.

UAmbassador Wutawunashe utshele abephephandaba leSunday Mail kuviki ephelileyo ukuba uhulumende uzimisele ukutholisa izisebenzi zakhe zonke iholo elingcono esithi kodwa lokho sekuzakuya ngakutholayo uhulumende.

please wait

No media source currently available

0:00 0:02:34 0:00


Facebook Forum

XS
SM
MD
LG