Sokuqhamuke ingxabano kubandla leMDC-T kulandela ukungavoteli ukuguqulwa kwesigqa sesisekelo sombuso welizwe esizapha uMnangagwa amandla okukhetha abehluli abafunayo.
Kulamalunga ebandla leMDC-T axhase ele Zanu PF kwabalamalunga alikhulu lamatshumi ayithoba munwe munye, 190 kuthi abavote ndawonye lomakhupe kunye labebandla leMDC Alliance baba ngamatshumi amabili lambili kuphela, 22 okutsho ukuthi amalunga ebandla leMDC Alliance angavotanga ayedlula amatshumi amahlanu, 50.
Omunye oweMDC-T ovote loMaKhupe nguNkosazana Nomvula Mguni. Sixoxe lesikhulumeli sika MaKhupe , uMnu. Khaliphani Phugeni.
Kunjalo nje, ngemva kokuvota edale lephalamende, kuphume imbiko kumaphephandaba lenkundleni zebulenjini inengi lisola ibandla leMDC-T ngokuthi amalunga alo yiwo axhase awe Zanu PF, okuyiwo amanengi kulelidale ukuthi umthetho lo uphumelele.
Abebandla leMDC Alliance bathi ezinye zezizatho ezibangela ukuthi besole lumthetho yikuthi uMongameli usengazikhethela abehluli bemthethwandaba kanye lafuna ukuncintisa laye kukhetho, abathi yikwephula intando kazulu.
Kodwa ilunga leMDC-T edale lephalamende uNkosazana Lindiwe Maphosa utshele uSthandekile Mhlanga weStudio 7 ukuthi uvotele lumthetho ngemva kokuwuhluza lokunanzelela ukuthi uthuthukisa abesifazana lamantombazana asakhulayo, okuyikho akubona kuqakathekile, kukanti okusolwa ngabanye akumqoka kangako ebantwini abanengi.