Ibandla leZANU PF lithi liphakathi kokulungiselela ukhetho oluzayo oluka 2023 kuzigaba zonke zelizwe njalo lilokhe lisamukela amalunga avela kumabandla aphikisayo eliqala ngokuwahlolisisa ukwenzela ukuthi ahambelane lembono yalo.
Isiphathamandla sebandla leZANU PF uMnu. Obert Mpofu izolo ubonakale emifanekisweni kumaphephandaba kanye lemsakazweni kahulumende elabantu abangamatshumi amabili lambili-22 eLupane ababikwa bevele kumabandla aphikisayo besiya kwelakhe.
Kodwa isikhulumeli sebandla leMDC Alliance eMatabeleland North, uMnu. Mhlonipheki Ncube uthi lelakhe ibandla liyabathola abavela kwamanye njalo seliqinise imikhankaso yokhetho lisebenzisa ingatsha ze Constituency Cordinating Committees ezincedisa kuhlelo lokubhalisela ukuvota ezigabeni olwe Polling Station based branches.
Asizweni uMnu. Ncube exoxa loSithandekile Mhlanga weStudio 7.
