Uhulumende uthi bonke abantu abavela kweleIndia besiza eZimbabwe sebebanjwa ngamandla ukuthi bahlale kuma-quarantine centers okwensuku ezilitshumi ukuze kubonakale ukuthi abalawo na umkhakha wecoronavirus oqhamuke kweleIndia olibulele umuntu oyedwa eKwekwe.
Kumbiko awethule izolo, umphathintambo wezempilakahle uMnu Constantino Chiwenga uthe kuqakathekile ukuthi uhulumende aphoqe bonke abavela kweleIndia ukuthi bahlale bebodwa okwensuku lezi kuqala ukuze kwehliswe ingozi yokumemetheka kwalumkhakha njengoba uvele usukhona eZimbabwe.
Igciwane leCovid-19 eliqhamuke kweleIndia leli limemetheka ngamandla njalo libikwa libulala abantu ukwedlula eminye imikhakha.
UMnu Chiwenga uthe labo abavela kwamanye amazwe kuzamele babe lencwadi ezitshengisa ukuthi bahlolwe phakathi kwamalanga amabili ayabe esanda kwedlula batholakala bengelayo iCovid-19.
Ukuhlaziya loludaba sixoxe loMnu Useni Sibanda, isiphathamandla senhlanganiso yeZimbabwe Christian Alliance, yona ephatheke kunhlelo zokwenqabela ukumemetheka kwalumkhuhlane.
