Lithuthukise amathuba alo awokuvikela inkezo ye Chibuku Super Cup iqembu lenguqu ele Highlanders ngokunqoba elikwenze emdlalweni walo wakuqala kumncintiswano walonyaka.
Impumela yemidlalo eyakuqala eyenkezo yeChibuku Super Cup itshiye iqembu le Chicken Inn lele Highlanders kuyiwo ahlezi phezu kwengalane kusibaya sika Group 2. Womabili lawa maqembu alemiklomelo emithathu iqembu ngalinye.
Iqembu le Chicken Inn linqobe ele Bulawayo City nge 2 ka nya ngoMgqibelo kwathi ngeSonto iqembu le Highlanders linqobe ele Bulawayo Chiefs nge 1 ka nya.
Ekhuluma ngemva komdlalo wabo umqeqetshi weqembu le Highlanders uMandla Mpofu uthe usasemude umango okumele bewuhambe ukuze bevikele inkezo abayiphakamise ngomnyaka ka 2019.
“Kithi kusaselomsebenzi omkhulu kodwa kukhona okungijabulisileyo okwenzakale kulumdlalo.
Nxa sikhangela phambili silomdlalo onzima olandelayo ngempelaviki ezayo kodwa ngithokoziswe yikuba abafana batshengisele ukuzimisela okukhulu langesikhathi behlaselwa kanzima,” kutsho uMpofu.
Umqeqetshi weqembu le Bulawayo Chiefs uThulani Sibanda uthi akasoze alahle imbeleko ngokufelwa ngoba abafana bakhe bedlale kuhle loba bedliwe.
“Ngokubona kwami sibahloniphe kakhulu ngehlandla lakuqala lomdlalo kodwa ngehlandla lesibili sidlale kuhle okokuthi nxa singangezelela kulokhu esikwenze ngehlandla lesibili emidlalweni elandelayo singaqhuba kuhle kakhulu,” kutsho uSibanda.
|
|
Iqembu le Bulawayo Chiefs lizadibana lele Bulawayo City emdlalweni walo olandelayo kusithi ele Highlanders lona lizadibana lele Chicken Inn.
Kusibaya sika Group 1 wonke amaqembu asele ephethe umklomelo owodwa ngemva kokuba iqembu le Yadah lele Caps United ebe ngutshiki lobhanqa 2 ka 2 ngoMgqibelo kwathi ngeSonto ele Harare City lele ZPC Kariba aba ngutshiki lobhanqa 1 ka 1 kwasekusithi ele Herentals lele Dynamos atshayane aze abhekana kungela elenelise ukulitshayela emambuleni.
Kusibaya sika Group 3 iqembu le Black Rhinos lihlezi phezu kwengalane ndawonye lele Cranborne Bullets ngemva kokuba ele Rhinos litshaye ele Tenax nge 4 ka 1 ngoMgqibelo kwathi ele Bullets linqobe ele Manica Diamonds nge 1 ka 0.
Izimbamgodi ezemba ilitshe le platinum yizo ezihlezi phezu kwengalane yesibaya sika Group 4 ngemva kokuba iqembu le FC Platinum libhaxabule ele Whawha nge 6 ka 0 kuthi ele Ngezi Platinum Stars litshaye ele Triangle nge 3 ka 1.