amalinks wokungena

Breaking News

Joram Gumbo: Ukwakhiwa Kwedamu le Tuli Manyangwe eMatabeleland South Kuhamba Ngesiqubu Sonwabu


Ukwakhiwa kwedamu leTuli Manyange

Umphathintambo obona ngenhlelo zikahulumende esebenzela ehofisini kaMongameli Emmerson Mnangagwa uMnu Joram Gumbo uvumile ukuthi ukusilela kwemali sekuphazamise ukwakhiwa kwedamu le TuliManyange elikhangelelwe ukuqeda udubo lwamanzi kanye lendlala eGwanda South.

Abakha lelidamu bathi uhulumende kabhadali kuhle okudala ukuthi umsebenzi ungahambi.

UGumbo ubevakatshele isigaba seMatabeleland South ukuzobona ukuthi umsebenzi wokwakhiwa kwedamu leli uqutshwa njani kunye lezinye inhlelo ezenziwa kulesi sigaba izolo.

Ukwakhiwa kwedamu leli sekuqalile njalo ngemva kokuma komsebenzi nyakenye ngenxa yokusilela kwemali.

Okhokhela ngokwakhiwa kwaleli damu uMnu Paul Dengu osebenzela inkampani yeChina Water and Electricity Corporation, utshele iqula ebelihamba loMnu Gumbo ukuthi ukwakhiwa kwalelidamu kuphazanyiswa yimali ebuya ngeziqephu.

UDengu uthi lonyaka baphiwe imali yakuleli engange $45 million lanxa kufuneka imali engange US$87 million ukuze lelidamu lakhiwe liphele.

“Lonyaka siphiwe iRTGS43 million, ayiyeneli kodwa izasiza ukuthi siphutshe eminye imisebenzi, iUS$87 million yiyo efunakalayo ukuthi siphutshe lumsebenzi, sizafaka njalo impompi zokulima ngokuthelezela eGuyu Irrigation.”

UGumbo uvumile ukuthi ukwakhiwa kwalelidamu kuhamba ngesiqubu sikafudu kodwa wathi uhulumende uzimisele ukufeza lumsebenzi.

“Ngizwa kuthiwa ukwakhiwa kwalelidamu kwacatshangwa ngabo 1960 njalo abakhayo bafika lapha ngo2006 kodwa ukwakhiwa kwalelidamu kuphazanyiswa yikusilela kwemali, ukuvela kombuso weNew Dispensation sekudale ukuthi lelidamu liqale njalo ukwakhiwa, sikhangelele ukuthi libe seliphelile ngemva kweminyaka emibili.”

UMnu Collin Sibanda olwela ukulondolozwa kwemvelo njalo eyisakhamuzi seNtepe uthi njengezakhamizi kabazange batshelwa lutho ngokwakhiwa kwalelidamu.

“Ezemvelo zonalezi kathesi siyabona kuyadilizwa izintaba laphana kunengi okunye okuzadilizwa okwemvelo kubiselwa njani?, kulokutshintsha kwesimo sezemvelo ekade sikhona kodwa kathesi nxa sekudilizilwe kuzakuma njani?”

Ngaphandle kwalokhu uSibanda uthi inengi labantu abaqhatshwe ukwakha lelidamu ngabantu bokuza.

“Kuzobuya indaba yokuqhatshwa eManyange, asisuthiseki kangako ngoba kulabantu abaSanitiser abantu egedini kodwa ulimi abalukhulumayo kathesi angizwanga kukhulunywa isiSotho loba isiNdebele kumbe ngithi isiKhalanga kulolunye ulimi olukhulunywayo okuveza ukuthi abantu laba ngabasuka khatshana kwezinye indawo kambe lapha asilabo abantu abanga sanitiser abantu , zonke lezi izinto kumele zikhangelisiswe.”

Umphathintambo wesabelo seZansi yemaNdebeleni uMnu Abedinico Ncube obekhaphe uGumbo uthi indlala izaphela du nxa lelidamu lingakhiwa liphele.

“Indlala indlala, nxa iTuli Manyange ingaphela ukwakhiwa sizabhabhayisa indlala, sesiphila.”

UMnu Lovemore Ncube oyisakhamuzi seMatobo uthi inhlelo ezifana lalezi kanye lolokubhalisa abaphatheka ekulweni impi yenkululeko ngamaqhinga ebandla elibusayo eleZanu PF yokuhuga usekelo kusiya kukhetho ngomnyaka ka2023.

“IZanu kathesi idinga indlela zokuthi abantu bayivotele, bantu khangelani ukuhlupheka ngendaba yeZanu leyi like linanzelele lokhu okwamanje okokubhalisa, salwa impi thina ngalesosikhathi sasinga mayouth kodwa nxa sesizobhalwa lamuhla sekuyiwa evotini sikukhangele ukuthi yindlela yokudinga usekelo sithi ebantwini limukani nxa selisiyavota khangelani.”

UGumbo ufike njalo emgwaqweni osuka eGwanda usiya eMaphisa osuleminyaka ungafakwanga ithara waphinda wavakatshela lapho okumelwe kwakhiwe iGwanda State University.

Phansi kohlelo olweNational Development Strategy NDS1 uhulumende uthi uzasebenza gadalala ukwakha amadamu ukuze kubelamanzi ezigabeni.

please wait

No media source currently available

0:00 0:05:29 0:00


Facebook Forum

XS
SM
MD
LG