amalinks wokungena

Breaking News

UMnu. Jacob Zuma Uzinekela Empaholiseni, Evalelwe Ejele leKwazulu-Natal


Abasekeli bakaMnu. Jacob Zuma ngesikhathi ephuma emuzini wakhe esiyazinikela emapholiseni, July 7, 2021. REUTERS/Rogan Ward

Owayengumongameli wakweleSouth Africa umnumnzana Jacob Zuma lamhlanje ulele ejele yeEstcourt esabelweni sakwaZulu Natal lapho azapika khona okwenyanga ezilitshumi lambili kusigwebo sakhe sokudelela umthethwandaba.

Kulemota ezimbalwa eziphelekezela uMnu. Jacob Zuma ngesikhathi ephuma emzini wakhe eNkandla sekusiyatshaya ihola letshumi lambili izolo ebusuku esiyazinikela enkambeni yamapholisa.

Ngemva kwalokho amapholisa amthethe amusa ejele yeEstcourt lapho azapika khona. Umthethwandaba weConstitutional Court uthole uZuma elecala lokukuwudelela ngemva kokwala ukulandela isinqumo sawo sokuthi ayephendula imibuzo phambi kwekomishini ecwayisisa ngenkohlakalo.

Isikhulumeli sikamphathintambo wogatsha lwamapholisa unkosazana Lirandzu Themba ukuqinisekisile ukubotshwa kukamnumnzana Zuma.

Umnumnzana Jacob Zuma usesezandleni zabomthetho ukuze aqale ukuyapika isigwebo sakhe.

Umnumnzana Mzwanele Manyi okhulumeli inhlanganiso yeJacob Zuma Foundation ugcizelele ukuthi umnumnzana Zuma uzinikele ukuze alandele umthetho kodwa hatshi ngoba ekholwa ukuthi ulecala.

Ukuzinikela kukamnumnzana Zuma sekumangalise abanengi njengoba ngaphambili ubethe akazukuya ejele njalo kulamakhulu abasekeli bakhe abebefunga besithi angabotshwa kuzachitheka igazi.

Ngesikhathi umnumnzana Zuma esiyazinikela bekulehlekana labantu elingatsho lutho esangweni lomuzi wakhe.

Isikhulumeli sebandla leAfrican National Congress umnumnzana Pule Mabe uchaze ukuvalelwa kukamnumnzana Zuma njengefu elimnyama kubandla leANC.

Inengi lezizalwane zeZimbabwe selemukele ngokudana ukuvalelwa ejele kukamnumnzana Jacob Zuma.

Isizalwane seZimbabwe umnumnzana Mlungisi Tshabalala uthi akavumelani lokuvalelwa kukamnumnzana Zuma.

“Sokungazathi kulandwa isigebenga umuntu obenguPresident elizweni. Bekumele ukuthi kube lendlela abanga dealer ngayo lelicala yokuthi bebone ukuthi why uMsholozi engafuni ukuthi uZondo abenguChairman wale ikomishini. Bafuna ukujabulisa bani ukuthi kubotshwe uZuma,“ kutsho uTshabalala.

Umnumnzana Greatman Mkhwebu laye uthi yinto edanisayo kakhulu.

“Kimi ngibona engathi yinto engekho right kakhulu ngoba uZuma akabulalanga muntu. Uzathola ukuthi izwe alisela zinzo kahle. Njalo singakhohlwa ukuthi ubaba uZuma walwela ilizwe. Ilizwe leSouth Africa likhululekile lamhlanje njengobanje ubona abantu bephithizela bethi akabotshwe mhlawumbe ngabantu abangaziyo kumbe abagcwele inzondo,” kutsho uMkhwebu.

Kusenjalo imuli kamnumnzana Zuma layo isiphawulile ngokuvalelwa kwakhe.

Enkulumeni eyethule kukhasi lakhe lezokuxhumana ku internet eletwitter, indodana kaMnumnzana Zuma umnumnzana Edward Zuma obefunga egomela ethi akekho ozobopha uyise uthe uzame konke angakwenza ukwenqabela ukubotshwa kukayise kodwa njengoba ekhethe ukuyazinikela laye usekwemukele lokho.

Indodakazi yakhe uDuduzile Zuma laye wethule umbiko kwelakhe ikhasi esithi bemukela ngenhlonipho enkulu ukubotshwa lokuvalelwa kweqhawe lempi yenkululeko ngenxa yemisebenzi yalo emihle.

Kusasa umthethwandaba weHigh Court ukhangelelwe ukwethula isinqumo kusicelo sikamnumnzana Zuma sokuthi angavalelwa ejele iConstitutional Court ize ilalele isicelo sakhe sokuthi isigwebo sakhe siguqulwe mhlaka 12 Ntulikazi.

please wait

No media source currently available

0:00 0:03:53 0:00


Facebook Forum

XS
SM
MD
LG