UMongameli weleSouth Africa uMnu Cyril Ramaphosa secele uzulu welizwe lakhe ukuthi atshiyane lodlakela olulokhe lusiya phambili lapho abantu abagqekeza khona amabhizimusi bethathe yiloba yini abakutholayo.
Ekhuluma ebusuku izolo, uRamaphosa uthe uhulumende wakhe usethumele amabutho lezinye ingatsha zomvikela esabelweni saKwazulu Natal kanye laseGauteng lapho abantu abangene khona emavinkilini aseJabulani Shopping Mall, eSoweto, izolo bathanyela impahla egoqela omabonamude, amafuriji, ukudla, izigqoko lokunye.
UMongameli Ramaphosa uthe sokubotshwe abantu abedlula amakhulu amathathu, 323 eGauteng labedlula ikhulu elilengxenye, 166, Kwazulu Natal. Uveze njalo ukuthi udlakela lobu solubangele ukumiswa kohlelo lokuhlatshwa kwabantu ijekiseni yeCovid-19 kwezinye indawo.
Udlakela lolu luqalwe ngabasekeli bakaMnu Jacob Zuma ngeviki edluleyo besithi bafuna akhululwe ejele.
UNtungamili Nkomo weStudio 7 uxoxe lomkhokheli webandla leMthwakazi Republic Party uMnu Mqondisi Moyo yena oxwayise uzulu weZimbabwe oseSouth Africa ukuthi engalokothi aphatheke kuloludlakela.
Sixoxe njalo lonobhala jikelele webandla leThe Patriotic Front uMnu Andrew Nyathi laye ekweleSouth Africa.