amalinks wokungena

Breaking News

Uzulu Wamukela Uhlelo Lokungena Kwe ZEC Ebantwini Bebhalisela Ukuvota


Ukubhalisela ukuvota phansi kwe BVR

Izakhamizi zakoBulawayo zamukele ngenjabulo uhlelo lokulanda abantu endaweni abakizo ukuze babhalise ukuthola ilungelo lokuvota, kulungiselelwa ukhetho lomnyaka ka 2023, olweMobile Voter Registration.

Uhlelo oluqhutshwa ngabekomishini ebona ngezokhetho eye Zimbabwe Electoral Commission olokubhalisela ukuvota luqale lamuhla elizweni lonke kodwa alukhangeli ukhetho lukaMbimbitho.

Ikomishini le, ifake indawo eziphosa zifike kunkulungwane ezintathu (2,713) ezokubhalisa abamizo ngehloso yokuthi uzulu enelise ukufinyelela lula indawo lezi.

Umnumzana Effort Ncube ingcwethi kwezombusazwe uthi iZEC ibisihlale kakhulu ingakwenzi lokhu khona kuyinto eqakathekileyo.

“Kuqakathekile ukuthi amaregistration lawa awokubhalisa ukuvota ayenziwe kusosonke isikhathi. IZEC ithethe isikhathi eside ingakwenzi lokho kumele kubeyinto ehlala isenzakala ngoba banengi abantu abafuna ukubhalisa ukuvota kodwa bayaliswela leli ithuba ngakho kumele kusondezwe ebantwini ukubhalisa. Ngiyakhuthaza abantu ukuthi basukume bayebhalisa ngobunengi ukuthi ilungelo labo lokuvota lingavimbeleki,” kutsho uNcube.

Umnumzana Meluleki Mloyi isakhamuzi sakoBulawayo uthi inengi labantu abafinyeleli lapho okubhaliswa khona.

"Leli linyathelo elihle kakhulu ngoba siyabona ukuthi isikhathi esinengi abantu abafinyeleli ngoba okubhaliswa khona ukuthi abantu bavote kuseceleni akufikeki .Leli lingaba linyathelo elihle ukuthi abantu loba besezindlini loba emsebenzini banelise ukuthi bebhalise. Esikufisayo yikuthi kungabi lalokhuyana okwakuqala ukuthi umuntu uyabiselwa emuva kodwa labe registry bangenele babone ukuthi wonke umuntu uyathola isithupha nxa kungolahlileyo babancedise labo benelise ukuvota,” kutsho uMloyi.

Umnumzana Greater Sibanda umhlali wakoBulawayo uthi kuqakathekile ukuthi abantu basuke bayebhalisa ukuze idolobho lakoBulawayo lingacini liphiwa iziqinti (constituency ) ezinlutshwane.

“Lithuba elihle okumele abantu bakoBulawayo balithathe babhalise ngobunengi babo. Ukubhalisa kuzenza ukuthi abantu bavotele abantu ababafunayo njalo lokuthi kungadliwa ama constituency emzini wakoBulawayo ongacina kusenza ukuthi uBulawayo engaphiwa imali eyeneleyo ukuthi athuthuke,” kutsho uMnu. Sibanda.

Unkosikazi Joice Siziba isakhamuzi seNkulumane uthi kuhle ukulanda abantu endaweni zabo ikakhulu ontanga ngoba balobuvila bokuhamba.

"Lokhu kulicebo elihle ngoba ontanga belobuvila bokuhamba besiyabhalisa ngezizatho zabo ezitshiyeneyo. Okukhona okumele bakunanzelele ikakhulu kubontanga yikuthi kumele babalande lapha abathanda khona bayabhalisa ngobunengi bekhuthazana okuzabalula,” kutsho uSiziba.

Inani labantu elizabhalisa yilo elizatsho ukuba isigaba ngasinye ngasinye sizakuba leziqinti ezingaki okuzaqhutshelwa kizo ukhetho. Nxa kukhangelwe abantu ababebhalisile kulungiselelwa ukhetho olwadlulayo izabelo zeMatabeleland ezigoqela iBulawayo, Matabeleland North kanye le Matabeleland South zilabantu abalutshwana ababhalisayo ukuvota.

Uhlelo lolu lokubhalisa luzenziwa ngamahlandla amabili, ihlandla lokuqala eliqale lamuhla lizagqitshwa ekupheleni kuka Nhlolanja kuthi elesibili lizaqala mhla zilitshumi (10) kunyanga kaMabasa luze luyephela ekucineni kwenyanga leyo.

Uhlelo lolu lokubhalisa amabizo alusoke lukhangele ukhetho olukhona kunyanga ezayo ekaMbimbitho ngoba ukubhalisa okwakukhangelane lokhetho lolu soluvaliwe.

please wait

No media source currently available

0:00 0:04:03 0:00


Facebook Forum

XS
SM
MD
LG