amalinks wokungena

Breaking News

Ababalisi Lezinye Izisebenzi Zikahulumende Bakhala Ngeholo Elikhuphulwe NgoLwesibili


Abenhlanganiso yababalisi eyeAmalagamated Rural Teachers Union of Zimbabwe-ARTUZ.

Izisebenzi zika hulumende zamukele ngemizwa ehlukeneyo ukwengezwa kweholo okwenziwe ngumqhatshi olikhuphule ngesilinganiso sokungamatshumi amabili ekhulwini - 20% ngedola leZimbabwe lamadola alikhulu eMelika.

UMongameli Emmerson Mnangagwa wethule isinqumo lesi ngoLwesibili esithi izisebenzi zikahulumende zizangezelelwa iholo ekuqaleni kwenyanga ezayo njalo zizakwakhelwa izindlu zithwalwe ngezimota zonke insuku ngesikhathi izikolo zivuliwe.

Lokhu kuza ngemva kokuba abanye ababalisi bekhalale umsebenzi ngesikhathi kuvulwa izikolo ngoMvulo besithi abalamali eneleyo yokugada amabhasi azabafikisa ezikolo.

UMnu Thembakuye Moyo, isikhulumeli senhlanganiso yababalisi eyeAmalgmated Rural Teachers' Union of Zimbabwe, uthi kuyabadanisa ukuba uhulumende kafuni ukubapha imali abababeyihola ngo2018.

Lokhu kugcizelelwe ngomunye umbalisi, uNkosikazi Nomathemba Mlotshwa, othi imali iholo eliphuphulwe nguhulumende kaleneli indleko zabo zenyanga.

Omunye umzali, uMnu. Pearson Sibindi, laye uthi imali le iyingcosana.

Kodwa omunye umbalisi, ongathandanga ukuvezwa igama, uthi imali le izabanceda ngoba uhulumende usezama ukubapha idola leMelika.

Lokhu kuphikiswe ngomunye umongikazi, uNkosikazi Patricia Phiri, othi kabasoze benelise ukuziphilisa ngeholo elikhuphulwe nguhulumende.

Imizamo yakuthola umbono kahulumende ngaloludaba yehlule kodwa embikweni wakhe awethule ngoLwesibili, umphathintambo wezemali, uMnu Mthuli Ncube, uthi bazazama ukuqhubeka bekhangelisisa izikhalazo zababalisi.

Izisebenzi zikahulumende ezigoqela ababalisi zifuna ukuphiwa iholo ababelithola ngomnykaka ka2018 lamadola angamakhulu edlula amahlanu eMelika- US$540.

Okwenziwe nguhulumende kucatshangelwa ukuba kwenzelwe ukwesabela ukuba ukutshengisela kwababalisi ngokungayi emsebenzini kungacina kusabalala kuzisebenzi zonke zikahulumende.

Uhulumende uphinde wathembisa ukuba uzabhadalela izisebenzi zakhe indleko zesikolo zabantwana babalisi, imali yokuya emisebenzini njalo balakho ukuthenga imota kwamanye amazwe ezingasoze zithele iCustoms duty.

Okunye njalo okuthenjiswe nguhulumende yikuba uzabakhela izindlu ezikolo eminyakeni emihlani elandelayo.

Facebook Forum

XS
SM
MD
LG