Kulababalisi abathi kababuyeli emsebenzini kubelabanye abafisa ukuqala umsebenzi kusasa kulandela ukumiswa okwesikhatshana kwabanye babo nguhulumende.
Abakunhlanganiso yeZimbabwe Teachers Association (ZIMTA) bathi ababalisi bonke kumele babuyele emsebenzini kuthi abakunhlanganiso yeProgressive Teachers Union of Zimbabwe batshaya phansi ngenduku besithi befuna iholo labo lihlawulwe ngamadola eMelika edlula amakhulu amahlanu – US$540 umuntu munye ngamunye.
Uhulumende usanda kukhuphula iholo lababalisi ngokuyisilinganiso sokungamatshumi amabili ekhulwini 20%.
USikhwicamfundo Sifiso Ndlovu, okhokhela iZIMTA, ukhuthaza bonke abakunhlanganiso yakhe ukuba bebuyele emsebenzini.
Kodwa uMnu. Lovejoy Sibanda, okuhlangothi lwabatsha kunhlanhaniso yePTUZ, uthi kababuyeli emsebenzini.
Uhulumende umise ababalisi imisebenzi okwesikhatshana esithi bakhalala umsebenzi okungekho emthethweni. Izikolo kazivulwanga ngemfanelo ngexa yababalisi abakhalala umsebenzi bekhonona ngeholo eliphansi. Kaselisanga ukukhuluma ngodaba lolu lesiphathamandla sikahulumende esibona ngezemfundo, uNkosikazi Evelyn Ndlovu, obengaphenduli umakhalekhukhwini.