Icala lentathelizindaba uJeffry Sinyoro Moyo, liqhubekele phambili lisahlulelwa emthethtwandaba kaMantshi oweTradegold, koBulawayo lamhlanje. Amagqwetha kaMoyo athi kumele akhululwe ngoba uhulumende esehlulekile ukuphuma lobufakazi obeneleyo obuveza ukuthi ngempela wephula umthetho njalo ulecala.
UMantshi Mark Nzira udlulisele phambili ukwahlulelwa kwecala likaMoyo kuMhlaka 7 Mbimbitho ngemva kokupha amagqwetha kaMoyo uNkosikazi Beatrice Mtetwa isikhathi sokuba aphanyeke isicele sabo esipheleleyo kusiyafika umhlaka u21 Nhlolanja kuthi uhulumende kumele abe esephendulile isicelo sokuba uMoyo akhululwe.
Igqwetha ebelimele uMoyo uBeatrice Mtetwa uchaza impumela yedale.
"Sibuye sikhangelele ukuba labafakazi abathathu abazakupha ubufakazi kodwa uMnu Academy Chinamhora weZimbabwe Media Commission nguye yedwa ophe ubufakazi obungelasisindo sokufumana uMoyo elecala athonisiswe kumbe acalwe njalo siphiwe iviki yokuphanyeka amaphepha sibhalela ukuba icala lilahlwe kuthi mhlaka 1 Mbimbitho uhulumende abe esenze isinqumo esizakwenza ukuba mhlaka 7 Mbimbitho uMantshi aphe isinqumo sokulahla icala kumbe ukulithonisisa esiyaphambili."
UMoyo ucalwa ngokuncedisa iNtathelizindaba ezimbili zeAmerica abasebenzela iNew York Times.
UMoyo ubotshwe ngoMabasa nyakenye wavalelwa okwamaviki edlula amathathu anduba avunyelwe ukuhlawula isibambiso seBail. Wetheswa icala lokutholisa izichence zokuba yiNtathelizindaba kuzizalwane ezimbili zeMelika uChristina Goldbaum loJoao Silva ezisebenzela iphephandaba eleNew York Times lokungena ezweni okungekho emthethweni esephula umthetho wokungena lokuphuma ezweni, oweImmigration Act. Intahtelizindaba zase Melika zahle zaphindiselwa ekhaya nguhulumende weZimbabwe zingaphiwanga lethuba lokuthonisiswa.
Ipholisa eliphenya icala leli uMnu Ben Justine uthi ulabo ubufakazi obutshengisa ukuba uMoyo wasebenza ngasese ukutholisa izizalwane zeMelika imvumo yokuzosebenza ezweni okungekho emthethweni.
Ukubotshwa kukaMoyo kusolwa ngabenhlanganiso ezinengi zentathelizindaba emhlabeni jikelele okugoqela eye Committee to Protect Journalists ethi lesi yisibonelo sokuhlukunyezwa lokwephulwa kwelungelo lokusebenza kwentathelizindaba zikhululekile e Zimbabwe.
