amalinks wokungena

Breaking News

Ababalisi Abanengi Lokhe Besithi Ababuyeli Emsebenzini Iholo Lingalungisiswanga


Abenhlanganiso yababalisi eye Progressive Teachers Union of Zimbabwe bathi akula lutho osoluguqulwe yikwengezelela kukahulumende iholo lamalunga alo, ngesilinganiso sokungamatshumi amabili ekhulwini-20% ngoba lokhu lingeneli lutho.

Inhlanganiso ezimela ababalisi zethula imibono ehlukeneyo ngokwengezwa kweholo lezisebenzi zikahulumende ngesikhathi ababalisi beqhubeka bengayi emsebenzini besithi kabalayo imali yokubhadalela indleko zokwenza njalo.

NgoMvulo abafundi babonakale bebiselwa emakhaya ngoba ababalisi bebelokhe bengekho ezikolo.

Abenhlanganiso yababalisi eye Progressive Teachers Union of Zimbabwe bathi akula lutho osoluguqulwe yikwengezelela kukahulumende iholo lamalunga alo, ngesilinganiso sokungamatshumi amabili ekhulwini-20% ngoba lokhu lingeneli lutho.

Umnumzana Raymond Majongwe unobhala jikelele wenhlanganiso le, uthi ababalisi lokhe behlezi ezindlini.

“Akulanto eguqukileyo ababalisi lokhe behlezi endlini, uhulumende lokhe engakaniki ababalisi imali, ababalisi bathi uhulumende aze abanike lokhu ayebathembise khona ababuyeli emsebenzini.”

Umnumzana Fortune Jamela unobhala wenhlanganiso eye Amalgamated Rural Teachers Union of Zimbabwe ARTUZ uthi uhulumende kangethuseli ababalisi, kakhangele umthetho awufakayo mayelana ngezisebenzi zakhe.

“Njengababalisi abaphansi kwenhlanganiso eyeARTUZ thina sithi asikabuyeli emsebenzini ngoba imali efunwa ngababalisi ayikafakwa. Lokhu okwenziwa nguhulumende esethusela abantu akusebenzi nxa sikhangela ustatutory instrument ka 2000, kabangaphicwa yilokhu abakubhalayo bona. Ngalokhu thina asikabuyeli emsebenzini.”

Umnumzana Future Maphosa ongumzali uthi ababalisi kufanele babuyele esikolo ngoba imfundo isisiwa.

“Ngibona kufanele ukuthi ababalisi babuyele esikolo ngoba abantwana abasafundi ukwenzela ukuthi lelizwe lingakhangelelwa phansi ngemfundo. Siyazi ukuthi bakhala ngeholo kodwa njengoba igovernment ikhulume labo ngendaba yeholo ngabe bayabuyela befundise abantwana ngoba akula lapha angadluli khona umbalisi.”
Unkosikazi Thandeka Msipha olomtwana ofunda ibanga laphansi uthi ulokujabula nxa sekulokuxoxisana lababalisi.

“Silokujabula nxa kulokuxoxisana phakathi kukahulumende lababalisi sithwele nzima kakhulu ngoba nxa ungenelisi ukubhadala ama extra lessons umtwana uyasalela emuva. Kubuhlungu kakhulu ukuthi umtwana abehlezi endlini abanye befunda nxa sekuthembisa lathi siyajabula.”

lnhlanganiso ye Zimbabwe Teachers Association i (ZIMTA) isivumelane lamanye amalunga ayo ukuthi babuyele emsebenzini besaqhubeka bexoxisana lohulumende. AbeZIMTA batshele iphephandaba le Sunday News ukuthi izakhulumisana lohulumende ukuthi ababalisi abakade bengayi emsebenzini kusukisela izikolo zivulwa bengamiswa umsebenzi. Lokhu kuphume emhlanganweni obukhona ngeviki ephelileyo ngoLwesihlanu lapho abathenjiswe ukuthi iholo labo lizabuyela kwelifana lebabelithola ngomnyaka ka2018.

U-Mnunzana Taungana Ndoro isikhulumeli sogatsha lwezemfundo uchaze ukuthi abakhangelelanga ukuthi ababalisi bangabuyela emsebenzini bafike bezihlalele.

“Sikhangelele ukuthi ababalisi babuye emsebenzini bezokwenza umsebenzi wabo”

Imizamo yokuxhana lomphathintambo obona ngezisebenzi zikahulumende usikhwicamfundo Paul Mavima yehlule ngoba ubengadobhi ucingo lwakhe. Ababalisi lobanje bengezelelwe iholo njengazo zonke izisebenzi zikahulumende bona bathi bafuna iholo labo libuyiselwe kulelo elomnyaka ka2018, lamadola eMelika angamakhulu edlula amahlanu-US$540 hatshi ukuthi babhadalwe ngedola leZimbabwe.

Udaba lwababalisi abakhala ngeholo eliphansi siluphiwa nguBathabile Masuku
please wait

No media source currently available

0:00 0:04:54 0:00

Facebook Forum

XS
SM
MD
LG