amalinks wokungena

Breaking News

Inhloko Zendaba Mhlaka 15 Nhlolanja, 2022


*** Kuphoselanwa ephilayo ebandleni elitsha eleCitizens Coalition for Change okuveza ukuba umumo awumanga kuhle kuleli bandla abanye besithi umkhokheli walo usedilize idale lakhe lenkokheli eleStanding Committee kodwa abanye bekulandula lokhu.

*** Ikhansili yakoBulawayo isungule uhlelo lwayo lokuvalela amanzi labo abangabhadalanga imithelo. Lokhu ithi ikwenza ngemva kokwazisa uzulu njalo ithi izakhamizi zilezikwelede zamadola angaphezu kweBhiliyoni-ZW$1,3Billion.

*** Abazali abanengi baveza ukukhathazeka okukulu ngomumo wemfundo lonyaka ngesikhathi ababalisi beqhubekela phambili bengayi emsebenzini. Lokhu kubikwa sokudala ukuba abafundi abangamantombazana bacine bewelwa luhlupho lokwehluleka ukuqhubekela phambili ngezifundo ngoba sebezithwele ngemva kokuchitha isikhathi eside behleli emakhaya bengayi esikolo ngenxa yeCovid-19.

***Ngokutshona kosuku lwayizolo kulabantu abaphansi kwekhulu-82, ababafunyenwe beleCOVID-19 njalo akula muntu obikwa ebulewe yilo, kubika abogatsha lwezempilakahle.

*** Inengi lezakhamizi ze Ntabazinduna, esabelweni seMatabeleland North lithi likhangelele ukuba lesivuno esihle lonyaka, kulandela ukuna kwezulu elinengi kuzinyanga ezimbalwa ezedluleyo laloba nje abanye bekhala ngokuthi izulu line kakhulu kwezinye indawo labulala izilimo kanye lokudiliza izakhiwo lemigwaqo kulesisigaba.

*** Umiswe phambi komthethwandaba izolo umongameli wenhlanganiso elawula umdlalo wenguqu kwele Zimbabwe uFelton Kamambo.

***KuLivetalk namhlanje kuhlelo “The Connection” sixoxa labatsha abakumsebenzi wokwethulwa kwezindaba ngomsebenzi wabo wokusebenzisa inkundla ezinjengamisakazo ukusabalalisa ulwazi lemfundiso kuzulu olugoqela olwecovid 19, ukhetho lwamaBy-electionsu, uhlelo lokubhalisa ukuthola ilungelo lokuvota olwe Voter Registration lokunye.

***Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318. Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke. Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.

Facebook Forum

XS
SM
MD
LG