amalinks wokungena

Breaking News

Amantombazana AweZimbabwe Azithola Esehluleka Ukubuyela eSikolo Ngoba Esezithwele


Amantombazana amanengi aweZimbabwe asezithola ezithwele ngesikhathi sokumele abuyele sikolo.
Amantombazana amanengi aweZimbabwe asezithola ezithwele ngesikhathi sokumele abuyele sikolo.

Abazali abanengi baveza ukukhathazeka okukulu ngomumo wemfundo lonyaka ngesikhathi ababalisi beqhubekela phambili bengayi emsebenzini. Lokhu kubikwa sokudala ukuba abafundi abangamantombazana bacine bewelwa luhlupho lokwehluleka ukuqhubekela phambili ngezifundo ngoba sebezithwele ngemva kokuchitha isikhathi eside behleli emakhaya bengayi esikolo ngenxa yeCovid-19.

Inengi labafundi babikwa sebebhekana lobunzima obehlukeneyo ngesikhathi ilizwe liphakathi kweziqondiso zokumelana leCovid-19 osokudale ukuba baphatheke kumikhuba esibaphambanisa impilo zabo ikakhulu abangamantombazana asebezithola bengesenelisi ukuqhubeka ngezifundo ngoba sebezithwele.

Umbalisi, uMnu Ndumiso Mabhena uthi amantombazana abhekane lezabo inhlupho kuthi labangabafana labo bazithola bekobunye ubunzima obehlukileyo.

“Njengombalisi ngikhathazekile ngokumitha kwabantwana abangamankazana ngoba sekuzababuyisela emuva empilweni kuthi abangabafana sebethatha izidakamizwa lobanje abaphazamiseke kakhulu ngamankazana ngoba bazithwele buye besasebancane.”

UNkosikazi Nokuthula Nkomo uthi ngesikhathi seCovid 19 Lockdown bekungela okunengi kokuzilibazisa okucine kungenisa abafundi ezilingweni beswela okokwenza.

“Abantwana ienvironment asebekhula ngaphansi kwayo isihlukile lendlela esakhula ngayo inengi labo selingena ebulenjini buye inengi Labantwana emakhaya yibo abazithweleyo ngoba ngesikhathi seCovid-19 lockdown bebengela izinto zokubalibazisa baphinde bamithiswe ngabantu abadala. Abantwana bathatha lezidakamizwa basuka bethi baya esikolo ngapha ababalisi bengekho ezikolo.”

Abanye abazali, ngabakhala ngokuthi uhulumende ngabe uyangenela kodwa bengachachi ukuthi enzeni. Omunye wabo nguNkosikazi Precious Ndebele wakoBulawayo.

“Sicela uhulumende angenele ngoba inengi Labantwana batshona bengela okokwenza uhulumende kangenele abantwana batshona egangeni bemithisana ngoba.”

Ukhansila kaWard 21 eNdiweni eBulilima, uNkosikazi Nani Ndlovu uthi lolu dubo lubhahile lasemangweni wakhe.

Inengi labatwana bazithwele abanye sebelabantwana bayehlulekile ukubuyela ezikolo kuyasikhathaza ngoba ngenxa yeCovid-19 bebetshona besemakhaya bengayi esikolo. Ukuzithwala kubhahile bazithwele abanye sebelabantwana kodwa ukwendisa besasebancane sikhuthaza ukufundiswa ngalolubhubhane abantu bahlatshwe zombili ijekiseni.”

Kuthe ngokuyekethiswa kweziqondiso zeCovid 19 Lockdown, sokumele abafundi babuyele esikolo lapho sezivulwa kwabonakala inengi lamantombazana selisehluleka ukwenza njalo ngoba selizithwele.

Osokujabulisa abanengi ngalezi nsuku eZimbabwe, yikuthi inani lasebebulawa yileli gcikwane lokhu lisehla. Sokuzinsuku ezintathu kungela loyedwa obulewe yilo umkhuhlane. Kuthi inani lasebehlatshiwe ijekiseni lakuqala selikuzigidi ezedlula kancane ezine-4,3million, asebehlatshwe elesibili beyizigidi ezedlula ezintathu-3,3million labazinkulungwane eziphose zifile ikhulu-84,770 asebehlwatshwe elesithathu.

please wait

No media source currently available

0:00 0:04:08 0:00
XS
SM
MD
LG