Uphele umoya kancane namuhla obencintisa ukhetho lokudinga umeya omutsha eMutare kulandela ukunqotshwa kwakhe ngomele ibandla leCitizens Coalition for Change elikhokhelwa nguMnu. Nelson Chamisa.
Umsekeli kameya, uFarai Bhiza, ubanjwe yisiyezi wazunguzenga kwabizwa abezempilakahle kusanda kubikwa ukuba unqotshwe nguMnu. Simon Chabuka, okubandla leCCC.
UBhiza, okubandla leMDC-T elikhokhelwa nguMnu. Douglas Mwonzora, utshele iStudio 7 uthi ubelesiyezi hatshi ukuthi uphele umoya kancane kubikwa impumela yokhetho.
UChabuka, omqobe ngamavoti ayisithupha, walile ukukhuluma ngodaba lolu esithi uselungiselela ukusebenza lozulu ekuthuthukiseni idolobho leli.
Obebukele kuqhutshwa ukhetho lolu, uNkosikazi Lynette Karenyi Kore, uthe ukunqoba kuka Chabuka kuveza ukuba ibandla leCCC ngelikazulu.
UMnu. Witness Dube, okuhlangothi olubona ngokwethulwa kwemibiko kubandla leMDC-T, uthi abantu balelungelo lokukhetha umuntu abafisa ukuba abamele.
ULoirdham Moyo uncedise ekulotshweni kodaba lolu.