amalinks wokungena

Breaking News

UNtando Ndlovu Uthi uMaKhupe, uBhebhe loNcube Abenze Umhlangano Osemlonyeni Kazulu Bebecubungula Ukubhalisela Ukuvota Kukhetho


UNkosazana Thokozani Khupe

Abelinye icele leMDC-T, elikhokhelwa nguNkosazana Thokozani Khuphe, bathi kuliqiniso ukuba umkhokheli wabo uhlangene loMnu. Abednico Bhebhe loSikhwicamfundo Welshman Ncube, owebandla leCitizens Coalition for Change, ngoLwesibili koBulawayo becebisana ngabangakwenza ukuhlenga izigaba zakoBulawayo ezilakho ukuphungulwa uma abantu bengabhaliselanga ukuvota.

Okumqoka okuphume emhlanganweni lo yikugqugquzela ukuba usapho lweZimbabwe luyebhalisela ukuvota, ikakhulu abasemhlubulweni weMaNdebeleni.

Isikhulumi seMDC-T, uMnu. Ntando Ndlovu, uthi kuvunyelenwe ukusebenza ndawonye kukhetho oluzayo njalo lohulumende enze inguquko kumthetho wokuvota ezweni.

“Inkokheli zamabandla aphikisayo yebo zibelomhlangano koBulawayo bevumelana ukuba basebenze ndawonye ekukhuthazeni uzulu ukuba ayebhalisela ukuvota, lokuba uhulumende enze inguquko esemthethweni kundaba zokhetho ezweni buye bakhuthaze wonke umuntu obhalisele ukuvota ukuba ayevota mhlaka 26 Mbimbitho kunyenga ezayo.

Ohlaziya ngezombusazwe uMnu Effie Ncube uthi ijoyo kwezombusazwe alisebenzi.

“Ijoyi kupolitiki alisebenzi, lamhlanje liyaxabana kusasa livuke lingabangane buye amabholoho kwezepolitiki awatshiswa abantu ababambisane, ukunqoba kudinga ukuba babambane ukuze banqobe kungakhathalekile ukuba bake behlukana ngemibono kumele babambane.

UNkosikazi Cora Ndebele, oqguqguzela ukuba abantu bayebhalisela ukuvota, uthi kuhle ukuhlangana kwenkokheli zesigaba.

“Akulanto embi eyenziwe nguWelshman loMama uMaKhuphe ngabantu abaqale ipolitiki bonke bayazana bayazana balakho ukuthi basebenzisane. Angiluboni uhlupho kuhle uMaKhuphe laye uma engabuyela kuCC ngoba libandla elitsha kuhle ukuthi babonane baxoxe.”

UMnu. Elphas Mashaba, ilunga lebandla elibusayo leZANU-PF eNketa, usole umhlangano waNgolwesibili.

“Ukwenza kwabantu abavele bephelelwe bengaze bahlale bahlangane asiboni ukuthi kuzaphumani thina njenge ZANU-PF ikhangelele ukuthi kuma by-elections azayo sithathe konke ngabantu abaphelelweyo.”

Bephendula ngomhlangano waNgoLwesibili enkundleni yabo yebulnjini eyeTwitter abebandla leCCC bathe abazilutho ngomhlangano lo kodwa bekhuthaza uzulu ukuba ayebhalisela ukuvota njalo aphinde ayevota kumaby-elections kunyanga ezayo.

UZulu uyakuncoma ukukhulumisana kwamabandla aphikisayo bekhankasela ukuyabhalisela ukuvota. Mhlaka 26 Mbimbitho izwe liyakukhetho libuyisela inkokheli zekhansili ledale ezazixotshiswe ngamabandla agoqela iMDC-T lePDP ngendaba ezihlukileyo.

Lumhlangano wenziwe ngasikhathi sinye abekhomishini ebona ngezokhetho eyeZimbabwe Electoral Commssion iqhubekela phambili ngohlelo lwayo lokukhuthaza abantu ukubhalisela ukuvota, kulungiselelelwa lokubumba izigaba ezintsha zokhetho luka2023.

Facebook Forum

XS
SM
MD
LG