amalinks wokungena

Breaking News

ZEC: Kusemthethweni Ukusebenza Kwethu Labezomvikela Lezinye Ingatsha Zikahulumende


FILE: Kubalwa amavoti ngomnyaka ka2018 ...

IZimbabwe Electoral Commission (ZEC) ithi kusemthethweni ukuba besebenzise amapholisa ensitha, amasotsha labanye abakungatsha zikahulumende ekuqhubeni ukhetho lwelizwe.

UNkosikazi Jane Pamhidzirayi Chigiji, obemele umholi weZEC, utshele intathelizindaba eHarare ukuba umthetho uyabavumela ukuthi besebenzise inhlangothi zonke zikahulumende ngesikhathi sokhetho, okugoqela isikhathi sokuvotisa uzulu.

“Isisekelo sombuso sipha ikhomitshini amandla ukuba ikhethe loba ngubani oncedisa kukhetho. Akukho emthethweni nxa laba abantu bengenza lokhu kungela kungenela kweZEC.”

Uthe kuyamangalisa ukuba amanye amabandla ezombusazwe akhangelele ukuba avotelwe kukhetho asola iZEC sonke isikhathi.

Uqhubeke esithi labo abathi ukhetho lweZimbabwe kalwenziwa ngemfanelo kumele bavezele iZEC ubufakazi balokhu.

“Labo ababona engani kuyaqilwa eZimbabwe kumele baphe ubufakazi. Nxa kusenzakalA lokhu kumele kube lomuntu osipha ubufakazi.”

Kodwa uMnu. Gift Ostallos Siziba, okhulume emele ibandla leCitizens Coalition for Change, uthe bayayisola kakhulu indlela iZEC esebenza ngayo.

“Into ekhona yikuthi IZEC yona vele iphazamisa umsebenzi ngokuphambanisa amabizo abantu lokusekela ibandla elilodwa. Kodwa njenge CCC sizaqhubeka sibona ukuba senze njani ukuze kube lokhetho olukhululekileyo.”

Ingcitshi kwezombusazwe esebenza ephansi kwenhlanganiso ye Zimbabwe Democracy Institute, uMnu. Bekezela Gumbo, uthi akumelanga ibutho labanye abezomvikela bencedise iZEC ekuqhubeni ukhetho.

“Amasotsha kumele engenele kukhetho kuphela kukusivikela. Nxa sebengena kuZEC kuphazamisa umsebenzi wayo likhomishini ngoba kumele isebenze ikhululekile.”

Eminyakeni edluleyo ngesikhathi kuqhutshwa ukhetho elizweni, inhlanganiso ezisebenzelana lozulu ezibona ngamalungelo oluntu, zivame ukusola IZEC ngokuphathisa ibandla elibusayo.

Facebook Forum

XS
SM
MD
LG