amalinks wokungena

Breaking News

Amalunga eOperation Dudula Atshengisele eJohannesburg Esithi Abokuza Abaphume Bephele eSouth Africa


Operation Dudula

Amakhulu lamakhulu ezizalwane zakweleSouth Africa ezingamalunga enhlanganiso ezibiza ngokuthi Operation Dudula atshengisele ngoMgqibelo ezitaladeni zelokitshini leHilbrow eJohannesburg besithi abantu bokuza ababophe imitshaqana yabo bebuyele kubo. Uthuso Khumalo usipha loludaba eseJohannesburg kweleSouth Africa.

Bezingadlanga nkotshana izizalwane zakweleSouth Africa zisidla amalahle zisithi azisabafuni abantu bokuza elizweni lazo.

Leliqembu lithi abokuza sebebathathele imisebenzi yonke osekubangele ukuthi umangoye abhazalale eziko emizini yabo. Bathi ongelamvumo yokuba kweleSouth Africa akaphume aphele. Ekufoleni kwabo bethekelele izitolo ezimbalwa bexwayisa abanini bazo ukuthi kusiyaphela insuku eziyisikhombisa bebesebexotshe zonke izizalwane zakwamanye amazwe sekungene ezakweleSouth Africa.

Isizalwane sakweleSouth okhokhela inhlanganiso ye Put South Africa uNkosazana Victoria Mamogolo uthi abakwenzayo akuhlangani lomkhuba wokucwasana ngobuzwe ngoba umthetho weSouth Africa uthi imisebenzi engadinga amakhono aphezulu kufanele yenziwe yizizalwane zakweleSouth Africa.

Omunye obeyingxenye yabebetshengisela laba uMnumzana Mario Khumalo utshele iStudio 7 ukuthi abakwenzayo bakwenza ngoba uhulumende esehlulekile ukuvala imngcele yelizwe.

Kodwake izizalwane zeZimbabwe ezikhulume leStudio 7 zangathandi ukuvezwa obala zithe kaziyindawo loba sekutshisa kanjani. Inengi lithi sekuleminyaka eminengi lisemisebenzini okuthiwa likhutshwe kuyo.

Umgcinisihlalo wenhlanganiso yeAfrican Diaspora Forum uMnumzana Vusumuzi Sibanda laye oke wafika kulokhu kutshengisela uthi abalahlupho ngelungelo lokutshengisela kodwa abaphikisana lakho ludlakela.

NgoLwesihlanu umphathintambo wogatsha lwezamapholisa uMnumzana Bheki Cele uxwayise amalunga eqembu leOperation Dudula ukuthi ekele ukungena ezitolo ebuza abaqhatshi ukuthi baqhatshe obani wathi njalo bekele ukuhamba bebuza abantu ukuthi baveze izithupha zabo loba amaphasipoti ngoba lokho akukho emthethweni. Lamhlanjeke bebeyiphiwe imvumo yokutshengisela ngezikhalazo zabo kodwa abavunyelwanga ukungena bangele phakathi kwala mabhizimusi.

Facebook Forum

XS
SM
MD
LG