amalinks wokungena

Breaking News

Imithelo Kamanisipala weGwanda Isizabhadalwa ngamaUSA


Idolobho le Gwanda.

Imithelo kamanisipala weGwanda sizabhadalwa ngamaUSA

UManisipala weGwanda uthi usezabhadalisa eminye imithelo yakhe ngedola leMelika kuphela. Izakhamizi zaleli dolobho ziyalisola kakhulu lelinyathelo zisithi azisoze lenelise ukuhlawula ngale indlela ngoba zihola ngamaRTGS.

Lokhu kumunyethwe kusaziso esethulwe ngumanisipala weGwanda esithi kusukela ngayonale inyanga imota ethwala izigulane I-Ambulance kanye leyokucitsha umlilo sezizabhadalelwa ngedola leMelika.

Ukubiza imota zikamanisipala ezokucitsha umlilo sokuzabiza ikhulu lamadola eMelika iUS$100 njalo kube lendleko yamatshumi amabili amadola-US$20 ngehola elilodwa lapho kucitshwa umlilo. Kuthi indleko yeAmbulance sokuzamele abantu bakhokhe amadola amahlanu eMelika phakathi kwedolobho kuphinde kube lendleko elingana ilitha elilodwa lepetulo kumakhilomitha amahlanu azahanjwa.

UNkosazana Lungile Masuku oyisakhamzi seGwanda uthi uManisipala abazange akhulumisane labo ngemithelo le emitsha.

“Angazi ukuthi bavumelane lobani kodwa sikhangele ukuthi nxa bevumelene labo khansila ukuthi imithelo leyi ibhadalwe ngedola leMelika kasombono omuhle lowo ngoba okokuqala abantu abaliholi idola leMelika ngokunjalo sokumele ukuthi lalabo uzithengisela amabanana kumele inyanga isiyaphela ubusule US$10 kumbe iR150”.

Amazwi la agcizelelelwe nguMnu Ndaniso Mpande esinye njalo isakhamuzi seGwanda.

“Hayi cha akuvumi,isinqumo lesi esithathwa ngumanisipala kasiyenzi , iGwanda igcwele kakhulu izisebenzi zikahulumende kasiyibambi leyo mali.”

UMnu Wellington Nare olilunga lenhlanganiso yabahlali beGwanda uthi lelinyathelo liveza obala ukuthi leli lizwe libhekane lobunzima.

“Isenzo lesi sitshengisa yethu kayisekho emnkambo akusela muntu oyihalelayo ungabona lengatsha zikahulumende ezifana lekhansili sezisithi limali kayisasebenzi ngcono sisebenzise eyakwamanye amazwe, umlandu sukuhulumende nga lawe uyavuma ukuthi imali leyi aseyiyo mali kusetshenziswe imali yakwamanye amazwe.”

UMeya weGwanda uMnu Njabulo Siziba uthi njengomanisipala bayayidinga imali yakwamanye amazwe ukuze baqhube kuhle inhlelo zabo.

"Sesehluleka ukuqhuba inhlelo zikamanisipala, yenalo uhulumende othe kumele sibhadalise ngemali yakuleli kasithengiseli amafutha ezimota ngemali yakuleli,kulobunzima siyazi izisebenzi zikahulumende zihola iRTGS kodwa yizo njalo izisebenzi zikahulumende ezisuka ziye koChicken Inn ukuyathenga ukudla ngemali yakwamanye amazwe."

Ukuya ekilinika kamanisipala sokuzabiza amadola amathathu eMelika kukanti ukuthengiswa komhlabathi okwakhela izindlu lakho kuzaqhutshwa kusetshenziswa idola leMelika.

Abamabandla ezombusazwe bakhangelelwe ukuthi babhadale amadola angamakhulu amathathu-US$300 ngelanga lapho befisa ukusebenzisa inkundla yePhelandaba Stadium ukuqhuba imihlangano yabo baphinde babhadale aakhulu amabili amadola eMelika-US$200 eyedeposit.

Imithelo yamanzi lokuthwalwa kwezibi izaqhubekela phambili ibhadalwa ngedola leZimbabwe.

Facebook Forum

XS
SM
MD
LG