amalinks wokungena

Breaking News

Okhokhela Uhulumende eGauteng Uthi Izizalwane Zakwele South Africa Kumele Ziyekele ‘Ukuzingela’ Abokuza


Kulomkhankaso weOperation Dudula kwele South Africa. (Photo: Thuso Khumalo)

Okhokhela uhulumende wesabelo seGauteng kwele South Africa, uMnu. David Makhura, usekhuthaze izizalwane zelizwe lakhe ukuthi ziyekele ukuhamba zizingela abokuza abaselizweni ngokungekho emthethweni ngoba lokho kungumsebenzi wamapholisa labogatsha lwendaba zasekhaya.

Esethula inkulumo yomnyaka yesabelo sakhe seGauteng umnumnzana Makhura uthe kuliqiniso ukuthi isabelo sakhe silenani elikhulu kakhulu lezizalwane zakwamanye amazwe. Uthe usenanzelele ukuthi zonke indawo lapho ethekelela khona izizalwane zakwele South Africa zikhonona ngokubaselizweni kwabantu bokuza abangene ngokungekho emthethweni.

Loba kunjalo uMakhura uthi ngamapholisa logatsha lwendaba zasekhaya kuphela abalamandla okudinga lokubopha abaselizweni ngokungekho emthethweni.

“Akekho ovunyelwa ukuthatha umthetho awufake ezandleni zakhe atholakale esebuza abantu ukuthi babuyaphi. Lokhu ngumsebenzi wamapholisa lohulumende.”

UMnu. Makhura uthi isabelo sakhe ngeke futhi sibe lesinye isehlakalo sexenophobia njengaseminyakeni edluleyo. Uthi akufanelanga kucine sekubulawa umuntu ngenxa yokuthi uphuma kwelinye ilizwe.

Ukhuthaze abakwamanye amazwe abangena eSouth Africa lesabelweni seGauteng ukuthi bakwenze lokho ngokusemthethweni.

Inkulumo yakhele iza ngesikhathi iqembu lezizalwane zakweleSouth Africa elizibiza Operation dudula, liqinisa imikhankaso yalo kulesi sabelo lihamba lisethekelela amabhizimusi, imikambo lezinye indawo besithi akuxotshwe izizalwane zakwamanye amazwe kungene ezakweleSouth Africa.

Kodwake isizalwane seZimbabwe, uMnu. Greatman Mkhwebu, uthi akakholwa ukuthi uMakhura uqinisile ukwenza sengathi akavumelani lenhlelo zeoperation dudula.

“Basuka bekwazi oMakhura ngoba bengabaholi bamaprovince. So yinto ekhona abayaziyo abazama ukucatsha ngomunwe. Bayabe besesaba ukuthi uma kwaziwa ukuthi yibo abahamba phambili igama labo lingangcoliseka emazweni. Into ayikhulumayo ayikho. Uyazi kahle ukuthi i operation dudula siyihlanyele ukuthi iyekwenza 1, 2, 3. Ayikho into eyenzakalayo ehlupha abantu bangaphandle izikhulu zikahulumende zingayazi. Bayazi hundred percent kodwa bayenza becatshe ngemuva.”

Inkulumo kaMakhura iza ngesikhathi sekubuye kwaqansa ukufuthelana phakathi kwezizalwane zakwamanye amazwe lazakweleSouth Africa. Lokhu kulandela ukuveza kwamapholisa ukuthi phakathi kwamasela ayisitshiyagalombili abulewe ngamapholisa, alitshumi abotshiweyo lamanye abalekileyo ngesikhathi edibana lamapholisa esehambweni lokuyatshontsha imali emoteni ethwala imali, banengi abeZimbabwe.

Ezinye izizalwane zakwele South Africa ezibhala enkundleni zokuxhumana ezebulenjini obe internet zithi lobu yibufakazi bokuthi abakwamanye amazwe badala amacala elizweni. Kodwake abanye abavumelani lalokho besithi akulunganga ukuthi ngokuganga kwehlekanyana besekugconwa umuntu wonke.

Facebook Forum

XS
SM
MD
LG