amalinks wokungena

Breaking News

UHulumende weBhilithane Uvuselela Uhlelo Lokubisela Abangelamaphepha Ekhaya


Uhulumende weBhilithane sephinde wavuka ubhova evalela lokubisela izizalwane zeZimbabwe ekhaya ezancitshwa imvumo yokuba yiziphepheli kulelo lizwe. Lokhu kulandela olunye uhlelo lwanyakenye olwenziwa nguHulumende lo lokubisela abake bavalelwa ejele bapika, besetheswa amacala okwephula imithetho yaseNgilandi.

Zikhala ezimathonsi izizalwane zeZimbabwe abazigola bazivalela kuma detention centres ukuze bazibisele ekhaya. Kulezizalwane zeZimbabwe ezedlula ikhulu ezibikwa sezivalelwe ema detention centres eNgilandi kuyonale iviki. Bakhangelelwe ukubiselwa eZimbabwe ngoLwesithathu.

UMnu Welcome Mpofu ngomunye ophakathi kwalabo asebemelele ukuphindiselwa eZimbabwe.

"Mina ngiseBrook House Detention Centre eseBrook House. Bafuna ukungibisela ekhaya njenge Asylum seeker mina ngafika lapha ngacela iAssylum. Wafika nini kulelilizwe? Ngafika ngo 2005 December, Sengile 17 years ngilapha."

UMpofu bamvalele esiyazibika ehosifisini yogatsha lwendaba zasekhaya kweleBhilithani ngezikhathi ezidaliweyo ngoba kungumthetho ukuthi abakuleso simo sokungabi lamaphepha okubavumela ukuhlala kulelozwe okusemthethweni beze ukuzozibika nyanga zonke bezosayinaamabizo ukuze bazakale ukuthi bangaphi. Ekhaya uthi akasela sihlobo ngakhoke akazi lokuthi uzakwenza njani.

"Since ngafika ngo 2005 nga claimer ngingena, ngingena eAirport eHeathrow lanamhlanje balokhe bengayithathi indaba yami. So lapha bakuvimbele usiya sayina? Bengihlezi ngingumuntu osayinayo yonke leyi iminyaka ngathi ngisiya sayina bangibamba. Imuli yami yonke abafowethu, abazali bonke sebatshona . Angila lapha engingaya khona."

Omunye ovalelwe kudetention nguMnu Memory Moyo ohlala edolobheni le Sheffield yena uthi ukhangelele ukuthi bazamkhulula kusasa.

"Hayi mina yimi nje kuphela engangiyenze imistake hanti. Hayi mina ngangingayenzanga ifresh claim so hanti babethe ngenze ifresh claim mina ngangayenzi, ya mina sengiyenzile awuzwa ngithi ngingaphuma noma kusasa"

Lanxa inengi lalabo abavalelweyo lingabantu abalemuli zabo babiselwa ekhaya betshiya ingane lamakhosikazi abo. UMnu Robert Kamanga wafika eBhilithane esemncane njalo ngomunye walabo okuthiwa abiselwe ekhaya etshiya abantwabakhe.

"Indabekhona siyathathwa ngenkani sitshiya imuli zethu isizatho bathi sancitshwa amaphepha okuphephela basibisela eZimbabwe bona besazi sabaleka khonq. Ngilabantwana abathathu njalo omama babo yizizalwane zeBhilithane."

UMnu Panyika Karimanzira ngowenhlanganiso emmela ilungelo lezizalwane zeZimbabwe ezicela ukuphephela eBhilithane eye Restoration of Human Rights. Yenake uthi basebenza nzima lamagqwetha bezama ukuvimba kokubiselwa kwabantu ekhaya.

"Thina abe ROH Zimbabwe lamabandla alwela ilungelo lobuntu siyazama ngazo zonke indlela ukuthi laba abantu bengabuyiselwa eZimbabwe. Inengi labo ngabantu abasuka eZimbabwe besesebancane njalo bayatshiya imuli zabo lapha kwele Bhilithane ma bengabuyiselwa eZimbabwe ,njalo sisebenza lamagqwetha athize abazama ukumisa ukubuyiselwa kwalaba bantu."

Ngomnyaka ka 2019 uhulumende we Bhilithane loweZimbabwe bavumelana ukuthi izizalwane zeZimbabwe sezingabiselwa ekhaya nxa zingelangwalo zokuhlala eBhilithane kungela dubo. Ngomnyaka ophelileyo kubiselwe inani eliphezulu labantu elake langena ejele ngamacala, okwamanje sebedobha abangela maphepha okuhlala la.

Ugatsha lukaHulumende weBhilithane olubona ngendaba zasekhaya olweHome Office lwalile ukukhuluma ngesizatho sokubiselwa kwabantu ekhaya, kodwa batshele iStudio 7 ukuthi bayaphambili ngohlelo lokubisela bonke abantu abangela maphepha okuhlala kulelizwe.

Udaba lokuphindiselwa ekhaya kwabangela maphepha eUK siluphiwa nguEzra Tshisa Sibanda
please wait

No media source currently available

0:00 0:03:46 0:00

Facebook Forum

XS
SM
MD
LG