amalinks wokungena

Breaking News

Ikhomishini Eqhuba Ezokhetho Isola Kakhulu Udlakela Olwenziwa Ngamanye Amabandla Ezombusazwe eZimbabwe


Justice Priscilla Chigumba At Mohlathe Hearing

Abekhomishini ebona ngezokhetho eyeZimbabwe Electoral Commission (ZEC) bayazisola kakhulu izehlakalo zodlakela elizweni bekhuthaza amalunga edale lephalamende ukuba bamangalele abadala lolodlakela emapholiseni lakwamanye amakomishini akhangela lezi zehlakalo.

Ekhuluma emhlanganweni lentathelizindaba, eHarare ngoLwesithathu, umgcinisihlalo weZEC uNkosikazi Priscilla Chigumba uthi kuyabadanisa njengekhomishini ukwanda kwezehlakalo zodlakela elizweni.

“Njenge ZEC asila mandla awokubopha labo abenza udlakela. Ngabe kuthiwa iphalamende yenza ukuba sivunyelwe ukubhalisa amabandla lokuba siphi izijeziso kulabo abancintisayo”

Kunje kulabantu ekade behlome ngombhobho lamahloka abahlasele endlini yomsekeli kamongameli webandla leCitizens Coalition for Change, uMnu. Tendai Biti, phakathi kobusuku namuhla bagamula owesilisa olinda endlini kaBiti eHarare walimala kakubi.

Imifanekiso ethunyelwe iStudio 7 iveza olinda uBiti esopha njalo elamanxeba okuganyulwa ekhanda. Abantu laba babikwa befike balwisana laye besithi bafuna uBiti, yena obengekho endlini. Obekhona ngunina lamanye amalunga omndeni abikwa ehlabe umkhosi ekuhlaselweni kwalumlindi.

Ofundela ubugqwetha njalo elwela amalungelo oluntu, uMnu. Emmanuel Zellers Gumbo, utshele iStudio 7 esekiliniki lomlindi lo ukuthi ulimele kakubi. Kodwa uthe ekiliniki katholanga ukwelatshwa okufaneleyo ngoba abongi bethe kumele aze lencwadi yamapholisa kuqala etshengisa ukuthi ulimale esenzani. UGumbo uthe bacabangela ukuthi lokhu kwenziwe ngabasekeli beZanu pf. Udlakela lolu luza ngemva kokubulawa kwelunga lebandla likaBiti uMnu. Mboneni Ncube eKwekwe ngeSonto ngabanakanelwa ukuba ngabasekeli bebandla leZanu PF abanye babo ababotshwe bakhululwa. Kodwa abeZanu pf bayakulandula lokhu.

Lokhu kusolwe kakhulu ngabenhlanganiso ezimele uzulu besithi IZEC kumele iphiwe amandla ngabe phalamende ukuba ibophe labo abenza udlakela lwezombusazwe.

UMnu. Marvelous Khumalo, owenhlanganiso yeHarare Metropolitan Residents Forum, uthi izehlakalo zodlakela elizweni sezizakwethusela abantu ukuze behluleke ukukhetha uhulumende abamfunayo.

“Njengenhlanganiso ezisebenza labantu sabuthana saba lomhlangano wezakhamizi wokulwisana lokuqilwa kokhetho. Sikhalaza kakhulu njalo siyadana ngalokho okwenzakala elizweni, sabona okwenzakala e Kwekwe e Epworth le Chitungwiza.”

Oncintisa ukuba ngummeli weNkulumane edale lephalamende uMnu Kucaca Phulu uthi bebengakhangelelanga ukuba ukhetho lwama by elections lungaba lodlakela.

“Kulusize kakhulu ukuba ngesikhathi sokukhankasela ukhetho abantu bayaqhubeka betshaywa. Lokhu kwenza ukuba ukhetho lolu lungcole, kuncindezela abantu ukuba bengakhethi abamfunayo.”

Kodwa omele ibandla le People’s Democratic Party, uMnu. Nqobizitha Masuku, uthi udlakela lungabe lubangelwa ngabasekeli bamanye amabandla abesaba ukunqotshwa.

“Leyi yinto embi ngoba bathi ubaba uMnangagwa uyesaba uChamisa. Kakulunganga lokhu. Lowo olwisa amabandla wephula umtheytho.”

Kodwa uMnu. Mabutho Moyo, oweZANU PF eyeetheswa umlandu wodlakela, uthi kungamanga lokhu.

“Sibajayele abantu beCCC. Liyazibonela ukuba imihlangano yethu ugcwele njani. Bengafaka Izanu PF phakathi lwalokhu”

IZEC ithi sekulabantu abambalwa abavela kwamanye amazwe abaveze isifiso sokuzokhangela ukhetho luqhutshwa abanye babo asebefikile elizweni okwamanje.

Kuyaxokozela eZimbabwe ngesikhathi abancintisa kulolukhetho bekhankasela ukuthola usekelo lwamavoti befuna ukuthatha izikhundla ezisele zingela bantu kumakhansili lasezigabeni ezitshiyeneyo kudale lephalamende kokuxhotshiswa kulezo zikhundla ngamabandla abalisa eleMDC-T lelePeople’s Democratic Party.

Facebook Forum

XS
SM
MD
LG