*** IZimbabwe imanyane lamanye amazwe womhlaba ekuthakazeleleni ilanga labesifazana lamuhla, eleInternational Women’s Day. Lonyaka leli langa linanzwa ngumhlaba wonke ngendikimba ethi “Gender equality today for a sustainable tomorrow”. KoBulawayo inhlanganiso yabomama eye Women’s Institute for Leadership Development inanze ilanga leli ngomkhankaso wokukhuthaza amabandla ezombusazwe ukuba alandele isisekelo sombuso esikhangele ukulinganiswa kwamathuba kwabesifazana labesilisa, ngenjongo yokukhuthaza abesifazana ukuba bangene ezikhundleni zobukhokheli.
*** Inhlanganiso ezimela intathelizindaba elizweni, zithi zizaphuma leziqondiso zokulawula umsebenzi wazo nxa uhulumende engaqhubeka emadolonzima ngokuphuma lomthetho wokuzilawula ngokusebenzelana lazo.
*** E-Matabeleland North leSouth abantu balakho ukulahlekelwa yizihlalo zedale lephalamende ezithile kulandela inani eliphansi lalabo ababhalisela ukuvota. Lokhu kuza ngemva kokuba abekhomishini ebona ngezokhetho eyeZEC bemise uhlelo lwabo lokulanda uzulu duzane lemakhaya, ngoba ngenyanga ezayo besungula uhlelo lokubala abantu ngemva kwalokho basebebumba izigaba ezintsha zokuvota.
***Abalimi bathi ukudla kuzasilela elizweni lonyaka ngenxa yokungani kwezulu eleneleyo njalo lanxa lingana, alisoze livuselele izilimo esezibunile.
*** Kulimala abantu elokitshini leAlexandra eGoli ngemva kokulwisana kwezizalwane zakweleSouth Africa lezakwamanye amazwe.
***KuLivetalk namhlanje kuhlelo “The Connection” sikhangela okwenziwa ngabasakhulayo kwezokubhalisela ukuthola ilungelo lokuvota, iVoter Registration lokuphatheka kwabo kwezombusazwe.
***Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318. Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke. Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.