*** Ele Zimbabwe libhekane lobunzima bokusilela kwe sinkwa kulandela ukumiswa komsebenzi wemikhumbi ethwala inqoloyi esuka kwele Ukraine, ngenxa yempi yokuhlaselwa kwalelo lizwe ngele Russia.
*** Uqhubekela phambili umkhankaso weOperation Dudula wokuxotshisa abadabuka kwamanye amazwe abasebenza kwele South Africa. Basanda kuthwalisa nzima abasebenza eBenoni lezinye indawo.
*** Ingcitshi kwezempilakahle yengqondo sezethule isixwayiso sokuthi amanyathelo athathelwa abokuza kwele South Africa agoqela ukumiswa kokusebenza kwamapermit ezizalwane zeZimbabwe, umthetho ohlose ukuphungula abokuza abasebenza kweleSouth Africa, umthetho uhlose okwenqabela abokuza ekwenzeni imisebenzi ethile, lokucwaswa kwabo ngobuzwe kulakho ukumemethekisa imikhuhlane yenqondo kuzizalwane zakwamanye amazwe esezibhekane lokubuyela ekhaya lapho ezabaleka khona.
*** Abake badlalela iqembu elimmela ele Zimbabwe emdlalweni wenguqu labake baqeqetsha leliqembu bathi iZimbabwe kumele yamukele isijeziso eyasetheswa yinhlanganiso ephethe ezenguqu emhlabeni jikelele eyeFIFA isola ukungenela kukahulumende emdlalweni wenguqu. Lokhu kulandela ukumiswa umsebenzi ngomnyaka ophelileyo kwabenhlanganiso elawula ezenguqu eZimbabwe eyeZIFA yikhomishini eyeSports & Recreation Commission SRC besetheswa umlandu wenkohlakalo, ukutshaphaza imali kanye lokuhlukumeza onompembe besifazana.
KuLivetalk namhlanje kuhlelo sikhangela imikhankaso yamabandla ezombusazwe yokudinga usekelo kukhetho lwamaBy-elections kanye lokwenzakala kwele Ukraine.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318. Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke. Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.