lzizalwane zeZimbabwe ezidabuka esiqintini seMzingwane, eMatabeleland South, esezihlala emazweni ziphathise ngokwakha indlu yezigulane lokufulela amahofisi esibhedlela se-Esigodini ebesesibhidlika.
Basukumela phezulu baqoqana njengenzalo yakulindawo kulandela izithombe ezamemetheka enkundleni zokuzilibazisa ezebulenjini, ezeSocial Media zibonisa isimo esibi kulesi sibhedlela.
Uhlelo olweEsigodini Hospital Project lwasungulwa ngabahlanu uMnu Ngqabutho Hanyana, uMnu Thobani Ncube, Unkosikazi Lucia Dube, Unkosikazi Thulani Ncube lo mgcinisahlalo wabo Unkosikazi Rosett Sibona bonke bayinzalo yaseMzingwane kuyibo njalo abakhokhela emkhankasweni wokubuthanisa imali yokulungisa lesisibhedlela. USibona uchaza ukuthi basebenza njani.
"Sahlanganisa abantu abayinzalo ye Umzingwane District ngokubumba inhlanganiso ku WhatsApp ezagoqela amazwe wonke jikelele lapho ebesikhumbulela khona ukuthi abantwana abayinzalo ye Umzingwane bakhona. Kwatholakala imali eyasiza ukuthi kupendwe ioutpatients department, kuthayilwe phansi kuphinde kufulelwe.
Uyaphambili okaSibona egcizelela ukuqakatheka kwalesisibhedlela
"Izihlobo zethu labantu abazalwa kuwonalwana umango bathi nxa labo besiyakwelatshwa babesendaweni ekhangeleka kuhle. Isibhedlela sesiGodini sisemgwaqweni oyakhonale eborder yeSouth Africa kusukela koBulawayo sisiza noma ngubani ongavelelwa yingozi kumbe yikugula ekulowo mango."
Uzulu wakulumango ujabule kakhulu ngokubona isibhedlela sabo sesilungiswe kahle. Omunye wabo nguMnu Ndabezitha Khumalo.
"Ngithanda ukubonga kakhulu kuma diasporans nabanye nje abaphathisileyo ukuthi kurenovethwe isibhedlela sesigodini sekubukeka kupendwe kuhle hayi kuhle kakhulu. Besesisidala lesisibhedlela, siyabonga kakhulu inkosi ilibusise ngezandla zenu ezingabangalikhuni"
Omunye laye othintekileyo ngobuhle obenziwe kulesisibhedlela ngu Nkosazana Sithokozile Mhlanga odabuka kulumango.
"Isibhedlela sesigodini besisesabeka, mina vele bengingeke ngivume ukulaliswa khona ngoba ngangibona engani ngiyafela khona. Awu sokukuhle khathesi okwamagama. Siyabonga kunzalo yakithi ngokusilungisela isibhedlela sethu unkulunkulu ababusise"
Abatshayeli labo somabhizisinisi bajabuliswe yikuvuselelwa kuhle kwalesisibhedlela abathi sinceda bonke abahamba ngomgwaqo osuka koBulawayo usiya eGwanda nxa begula. UMnu Ngqabutho USaMamo ngomunye wabo.
"Ngiyabonga kakhulu ebantwini abaku diaspora ngosizo lwabo abalwenzayo ngesibhedlela lesi sesigodini ebesesifile ngokusivuselela. Kuyimpumelelo enhle kakhulu ebantwini bakithi ngoba kunzima kubalezingozi zomgwaqo laphana abantu baswele ukuthi bazahanjiswa ngaphi sebelimele. Liyazi uBeitbridge Gwanda Road ngumqwaqo obhizi kakhulu"
Abesigodini Hospital Project bathi umsebenzi usumnengi kulesisibhedlela njalo abamanga bafuna ukulungisisa amanye ama wards ngakho sebeqalisile njalo umkhankaso wokubuthanisa imali yokuncedisa esigabeni sesibili sokulungisisa isibhedlela sabo.
