amalinks wokungena

Breaking News

Kulabantu Abathi uBiden Wenze Kahle Ukuthengela eleUkraine Izikhali Zokulwisana leleRussia


Abakubutho leMelika bahlola imibhobho yama stinger missiles.
Abakubutho leMelika bahlola imibhobho yama stinger missiles.

Kulabantu abancoma okwenziwe lilizwe lakwele Melika eselinike eleUkraine izikhali zokulwisana leleRussia, ezibiza izigidi ezingamakhulu ayisitshiyangalombili zamadola – $800 million.

Kulabanye njalo abathi lokhu kuzakwenza kube lempi eyesabekayo kwele Ukraine ngoba umkhokheli wakwele Russia, uMnu, Vladmir Putin, uselolonga ibutho elikhulu eligoqela abasebenzisa imikhumbi ethwala imibhobho ebulala abantu abanengi.

UBiden wenze lokhu izolo kulandela isicelo sikamongameli wakwele Ukraine, uMnu. Volodymyr Zelenskyy, owethule umbiko oqakathekileyo edale leU.S. Congress. UBiden uthi ilizwe lakhe lizanike eleUkraine imibhobho egoqela eyokudubula indizamtshina zakwele Russia ezibhomba mahlayana kulelolizwe. UMnu. Muzi Dube, olandela okwenzakala kwele Ukraine, uthi uBiden uzwela abantu bakwele Ukraine.

UMnu. Nhlanhla Moses Ncube, okunhlanganiso yeFreedom Alliance, uthi kukhangelelwe ukuthi ukulwisana kwamazwe la kuzaqhubekela phambili ngamandla.

Lokhu kusekelwa nguMnu. Joseph Tshuma, okubandla leZanu PF.

Bakhala njalo ngokuzakwenzakala kuzizalwane zeZimbabwe ezifunda kwele Ukraine esezibaleka kulelolizwe. UNcube uthi abafundi laba sebephelelwe ngumphako.

UTshuma laye uthi kuyadanisa okuzakwenzakala kubafundi abadabuka kwele Zimbabwe ezifunda kwele Ukraine.

Okwamanje uhulumende kaPutin ubhomba ngamandla emadolobheni atshiyeneyo kwele Ukraine njalo uthi ibutho lakhe elisebenzisa imikhumbi ethwala imbibhobho emikhulu sokumele lisuke duzane lakwele Japan liye kulwandle lweBlack Sea duzane lwakwele Ukraine.

Kusenjalo, uMnu. Llyod Austin, okhokhela uhlangothi lwezomvikela kwele Melika ukwele Slovakia namuhla, lapho abonisana khona lamanye amalunga eNATO indlela zokulwisana loPutin.

XS
SM
MD
LG