Umkhokheli webandla leCitizens Coalition for Change, uMnu. Nelson Chamisa, uthi uMongameli Emmerson Mnangagwa labanye bakhe yizigilamkhuba ezitshotshozela udlakela ngesikhathi sokhetho.
UChamisa wethule lokhu namuhla emhlanganweni webandla leli eMasvingo owokukhankasela ukhetho lwama by-elections oluzayo.
“Sinanzelela ukuthi kwamanye amazwe abantu bayavunyelwa ukuba besekela amabandla ezombusazwe abawafunayo. Lapha eZimbabwe ibandla elibusayo elilezigilamkhube ezilikhokhelayo lithwalise nzima abaphikisayo. Kumele kukhitshwe idimoni leli. Mnangagwa kumele wenze okwenelisayo lami ngenze okungifaneleyo. Okhetho iZanu ukhetha udlakela. Okhetha mina ukhetha ingubekela phambili.”
Umsekeli wesikhulumeli sebandla leCCC, uMnu. Gift Ostallos Siziba, uthi bathwaliswe nzima ngamapholisa lebandla elibusayo.
Ibandla leZanu PF lithi kalikhahlamezi amalunga amabandla aphikisayo. Lithi iqhubeka ngemfaneli imikhankaso yabo yokhetho oluzayo. UMnu. Believe Gaule, ilunga lebandla leli, uthi uzulu uthakazelela okwenziwa libandla leZanu PF.
Abacubungula ezombusazwe basola kakhulu ubudlwangudlwangu obenzakala ngesikhathi amabandla ekhankasela ukhetho oluzayo.
UMnu. Effie Dlela Ncube, ingcwethi kwezombusazwe ezimeleyo, uthi amabandla aphikisayo kawakhankasi ekhululekile.
Eyinye njalo ingcwethi kwezombusazwe, uMnu. Rejoice Ngwenya, uthi kukhanya engani iqhubekela phambili kahle imikhankaso yamabandla atshiyeneyo.
Okunhlanganiso yeFreedom Alliance, uMnu. Nhlanhla Moses Ncube, uthi kwephula inhliziyo okwenziwa libandla elibusayo elithwalele ubhulo aphikisayo.
Ukhetho lwama by-elections luzakwenziwa ngoMgqibelo. Kuvotelwa amakhansila lamalunga edale lephalamende endaweni okwaxotshiswa khona amalunga edale leli libandla leMDC-T lele People’s Democratic Party. Kulamalunga atshona kwezinye indawo.