Inhlanganiso yeKopanang Africa Against Xenophobia ithi isisiya emthethwandaba ngemva kokuba amapholisa esemise ukutshengisela kwayo obekumele kwenziwe ngoMbulo eJohannesburg.
Isikhulumeli senhlanganiso yeKopanang Africa, uMnu. Dale Mckinley, utshele intathelizindaba namuhla ukuthi baphatheke kubi kakhulu ngemva kokuba amapholisa emise ukufola kwabo emigwaqweni bekhuthaza ukumiswa komkhuba wokuhlukuluzwa kwabantu bakwamanye amazwe kwele South Africa. Uthi sebebhalele emthethwandaba befuna kuchithwe isinqumo samapholisa lesi.
“Sifuna umthethwandaba usiphe imvumo yokutshengisela ngoba lokhu kulilungelo lethu.”
Omunye wenkokheli zale inhlanganiso, uNkosikazi Jenet Munakamwe, uthi ngokokuqala kwele South Africa ukubona amapholisa evimba ukufola kwabantu abakhuthaza ukuhlonitshwa kwamalungelo oluntu.
“Babonile ukuthi ukufola kwethu kuzaveza ukwephulwa kwamalungelo abantu bokuza.”
Isizalwane sakwele South Africa, uNkosazana Sibongile Tshabalala, uthi akavumelani lokuhlukunyezwa kwabantu bokuza okwenziwa ngamaqembu afana le#SouthAfricaFirst eqhuba umkhankaso we-Operation Dudula. Uthi okubahluphayo yikuthi bakhona abaphathintambo angathi bayakusekela lokhu.
“UMinister Aaron Motsoaledi akangathi uma ehlulekile ukwenza umsebenzi wakhe asebenzise ama criminals on the ground. Bheki Cele umsebenzi wakho ngowokuprotector abantu abaseSouth Africa irregardless ukuthi ba documented or abakho documented.”
Isizalwane seZimbabwe, uMnu. Dumisani Nleya, laye oyingxenye yale inhlanganiso, uthi kukhanya sengathi ukwaliwa kwesicelo sabo sokufola kukhombisa ukuthi amapholisa ambaxambili.
“Bona babonise engathi bayesaba i operation dudula. Thina i-Operation Dudula loba singalwi layo asiyesabi ngoba operation dudula yinhlangano yezikliwi.”
Encwadini ebhalelwe inhlanganiso yeKopanang Africa, amapholisa athi angeke abavumele bafole ngoba abaqhuba umkhankaso weOperation Dudula bazabahlasela.
Ithi njalo ibalele ngoba kulamahungahunga okuthi abafuna ukufola laba ngabaselizweni ngokungekho emthethweni. IKopanang Africa ithi zonke lezi zizatho lizabanje lamapholisa ngakho sebehlele ukuthi umthethwandaba ungabavumela bazaqhubeka ngokufola lokhu ngeviki ezayo ngoMgqibelo.