UMongameli Emmerson Mnangagwa uthi abakubandla leMthwakazi Republic Party (MRP) kumele bethule zwi ngokuquma ilizwe uma befuna ukuphila isikhathi eside emhlabeni.
Inkampani yezindaba eyeNewZimbabwe ibika ukuba uMnangagwa wethule lokhu namuhla ekhuluma emhlanganweni webandla leZanu PF wokukhankasela ukuvota kukhetho lwama by-elections oluzakwenziwa ngoMgqibelo.
UMnangagwa uthe, “Kulabanye abathi bangadla indlubu bequmba abanjenge Mthwakazi bakhulume ngokuquma ilizwe benze iRepublic of Mthwakazi. Lalelani ngikhuluma khonamanje. Angikababophi. Bazakhuluma, bekhulume, beguge, befe eleZimbabwe lilokhu libizwa ngokuthi yiZimbabwe. Leli lilizwe elizimeleyo elilodwa. Akulamuntu ozaliquma.
“Nxa bengabantu abalalelayo, kabalalele bethule njalo besebenze lohulumende okhona bephile kahle. Bengaqhubekela phambili besenza into yabo le bazathwala nzima. Akulalizwe emhlabeni wonke jikelele elithakazelela ukuqunywa kwalo. I-United Nations Charter iveza kahle imingcele yamazwe emhlabeni wonke jikelele. Lokhu kugoqela isimo sakwele Zimbabwe ngendlela eyikho okwamanje. Akulamuntu ozadabula ilizwe leli alenze okungamazwe okutshiyeneyo. Ungenza lokhu uyabe udinga ukuphelelwa yimpilo. Hamba ngendlela ezakunika impilo ende. Hamba ngendlela eyokwakha.”
Kasenelisanga ukukhuluma ngodaba lolu loMnu. Mqondisi Moyo, umkhokheli webandla leMRP, obengaphenduli umakhalekhukhwini.
Ibandla lakhe lifisa ukuba kuqunywe ilizwe leZimbabwe abadabuka eNkabazwe leMatabeleland bezibuse.
Umkhokheli wenhlanganiso yeMthwakazi Liberation Movement, uMnu. Paul Siwela, wabaleka eZImbabwe kulandela ukukhuluma kwakhe kabanzi ngokuquma eleZimbabwe.