amalinks wokungena

Breaking News

Abantu Abanengi Bakhala Ngendlela iZEC Eqhuba Ngayo Ukhetho Lwama By-elections


Abantu abanengi bathi ukhetho oluzayo seluphekwaphekwa yikhomishini yeZimbabwe Electoral Commission.

Inhlanganiso ezitshiyeneyo zithi kumele ikhomishini yeZimbabwe Electoral Commission iqhube ukhetho olukhululekileyo kusasa ngesikhathi amabandla aphikisayo ekhonona ngokungaphathwa ngemfaneli amabhokisi okuvota lendawo zokuvotela.

Abakhuthaza ukuba kuqhutshwe ukhetho olukhululekileyo bagoqela amalunga eZimbabwe Election Resource Center, Zimbabwe Election Support Network, Zimbabwe Christian Alliance labanye.

Kulamabandla aphikisayo athi ukhetho lolu soluphekwaphekwa yiZEC endaweni ezitshiyeneyo lapho okuthiwa kulabanye abaqhuba ukhetho lolu abatholakale bevota izolo bebodwa njalo kwafakwa indawo zokuvotela ezigabeni ezilabalandeli abanengi abebandla elibusayo.

IZEC ithi isahlolisisa konke lokhu okwethulwa ngamabandla agoqela eleCitizens Coaltion for Change ekhokhelwa nguMnu. Nelson Chamisa.

UMfundisi Useni Sibanda, umqondisi weZimbabwe Christian Alliance, uthi kuqakathekile kakhulu ukuba iZEC iqhube ukhetho ngemfanelo.

UMnu. Joseph Tshuma, okubandla leZanu PF, uthi kulabantu abethula amanga aluhlaza tshoko enkundleni zokuxhumana ngokhetho lwama by-elections.

UTshuma uthi kumele abantu bevote ngobunengi babo.

UMnu. Janana Ngwenya, ofisa ukuba ngukhansila eMganwini, uthi ulakho ukunqoba kukhetho lolu.Uthi kuyayangisa ukuba amanye amabandla abekhankasa enika uzulu ukudla okunjengempuphu, inkukhu, amabele kanye lemali.

Banengi abantu abalandela ukhetho lolu emadolobheni lemaphandleni. UMnu. Trymore Mpofu ohlala eBulilima West, ngomunye wabo.

Omunye wakhe, uMnu. Blessing Dumani, uyakhala ngendlela ukhetho oluqhutshwa ngayo.

UMnu. Thembalani Moyo, isakhamuzi seKwarai eLupane, esabelweni seMatabeleland North, laye uyalulandela ukhetho lolu.

Kusasa kuvotelwa amakhansila labazamela izigaba ezitshiyeneyo edale lephalamende kulandela ukuxotshiswa kwababemele lezondawo libandla leMDC-T lele People’s Democratic Party. IZEC ithi asekuzinga eliphezulu amalungiselelo okhetho lolu ngoba sebelungise zonke indawo zokuvotela.

UNkosazana Linda Masarira, okhokhela elinye ibandla eliphikisayo obecele ukuba umthethwandaba uhlolisise indlela ukhetho oluqhutshwa ngayo uthi iHigh court iluphosele khatshana udaba lwakhe.

Facebook Forum

XS
SM
MD
LG