amalinks wokungena

Breaking News

Abalwa Impi Yenkululeko Asebehlale Insuku Ezimbalwa Egcekeni eGwanda Bakhala Ngendlala Lokungagezi


Abalwa impi yenkululeko basedolobheni leGwanda, Matabeleland South. (Photo: Albert Ncube)

Abalwa impi yenkululeko abangatholanga imali eyaphiwa abanye babo asebebhalisa ukuthi bayithole sebelensuku belala egcekeni eGwanda bengela kudla njalo bengagezi.

Inengi labalwa impi yenkululeko abaxoxe lomsakazo weStudio 7 bathi bafike edolobheni leGwanda ngeSonto njalo lokhu bengakabuyeli emakhaya abo ngenxa yokuxokozela okukhona endaweni yeGwanda District Club lapho loluhlelo lokubhalisa oluqhutshwa khona.

Inengi lithi selinuka phu ngenxa yokungagezi kukanti njalo liphethwe yindlala kuthi labo abanatha amapahilisi eBP bakhala ngokuthi sephelile.

UNkosikazi Nomalanga Ncube oweMatobo ngomunye walabo abafike ngeSonto, odla amalahle.

“Sibiziwe sizihlalele emakhaya , nga asibizwanga besingeke sihlangane lakho konke lokhu esikubonayo,ngabe asikho la, kuvetter njani angaphi amafomu abantu bahlukuluziwe ngesikhathi sempi lakathesi ngeke sithi sokulungile ngoba abantu lokhu behlukuluzwa.”

Omunye walabo esixoxe labo nguThembalani Moyo othi, “Lokhu sifike ngeSonto amafomu ethu labizwa, kasigezi kodwa ukudla sidingelwe ehofisini yeZanu, kodwa ukugeza lama toilet kuyahlupha.”

UNkosikazi Olesia Ndlovu uthi usephelelwe ngamaphilisi akhe eBP ngoba ebuye esithi uzaphangisa ukuphenduka.

“Mina nginatha amaphilisi eBP sephelile sokunzima bengibuye lamahlanu kodwa kawasekho ngeke ngiphenduke ngingabhalisanga ngiyabe ngilandeni.”

UNkosikazi Philisiwe Ndlovu uthi abanye sebezebegula belinde ukubhalisa.

“Ngolwesithathu omunye umakhelwane uqale ukugula manje sekumile sihambe bathi eyinye ifomu ayiqondanga asisakwazi ukuthi sithini ngokugulayo.”

UMnu. Austin Sibanda uthi kuyafika isikhathi sokuthi azisole ngenyathelo lokuya empini ngoba bengaphathwanga kakuhle.

“Sibhalise kusukela ngabo1985 silokhu sibhalisa, kwesinye isikhathi uyake uzisole ukuthi ngangisiyadingani empini ngabe ngazihlalela ngafunda ngabe ngingcono kulalokhu engiyikho khona ngoba bonalabo esabatshiyayo sisithi siyakhulula ilizwe yibo kathesi asebesibusa , yibo abasitshontshelayo yibo abaluthayo.”

Uhlelo lokubhalisa abalwela impi yenkuleleko kanye labancedisayo luphinde lwaphazamiswa yikuna kwezulu lamhlanje okutsho ukuthi inengi lisazolala ezitaladeni zedolobho leGwanda ngendlala.

Facebook Forum

XS
SM
MD
LG