amalinks wokungena

Breaking News

Ibandla leCitizens Coalition for Change Linqoba Kukhetho Lwama By-Elections Ezigabeni Ezinengi eZimbabwe


Ibandla leCitizens Coalition for Change linqobe endaweni ezinengi eZimbabwe. (VOA)

Ibandla elitsha eleCitizens Coalition for Change (CCC) linqobe ezigabeni ezinengi kukhetho olwenziwe izolo, ikakhulu emadolobheni. Lihluthunelwe ezinye izigaba libandla leZanu PF lapho obekukhangelelwe ukuba lizanqoba khona. Ibandla leMDC-T likhe phansi ezigabeni zonke, okutshiye abalandeli balo bebambe owangaphansi.

Loba nje ibandla leCCC linqobe endaweni ezinengi lihluthunelwe libandla leZANU PF isigaba seMutasa South leEpworth, ezaziphethwe ngumanyano weMDC Alliance, owake wakhokhelwa nguMnu. Nelson Chamisa. Inhlanganiso yeZimbabwe Electoral Commission kayikethuli impumela yokhetho lolu kwenzinye izigaba loba lokhu kulotshwe phandle kwendawo zokuvotela elizweni lonke jikelele.

Kasenelisanga ukuxoxa leziphathamandla ze-ZEC ngempumela yokhetho lolu. Okuvezwe yiZEC endaweni zokuvota, kutshengisa ukuba eleCCC linqobe ezigabeni ezingamatshumi amabili – 22 kwathi ibandla elibusayo lathola eziyisithupha kukhetho lwabazamela izigaba lezi edale lephalamende. EleCCC liphose lathola wonke ama-wards kukhetho lwamakhansili emadolobheni kwathi eleZanu PF lathola okuyingcosana.

Umanyano weMDC Alliance ubungatholi lona ivoti elilodwa kwezinye indawo loba belilabantu abalinde impumela yokhetho kulezozigaba. Abantu abanengi bavotele iZanu PF eTsholotsho, Gokwe Central, Mwenezi lezinye emaphandleni.

EleZapu lamanye aphikisayo adonse nzima kukhetho lolu. Balutshwana abantu abavote kukhetho lolu elizweni lonke jikelele. UMnu. Felix Magalela Mafa, umsekeli wesikhulumeli sebandla leCCC, ekhokhelwa nguChamisa, uthi bathokozelela impumela yokhetho lolu.

Onqobe eBinga kukhetho lokudinga ozamela isigaba lesi edale lephalamende, uMnu. Prince Dubeko Sibanda, laye uthakazelela impumela yokhetho lolu.

Umsekeli webandla leZanu PF, uMnu. Munashe Mtutsa, uthi ibandla lakhe lenze kahle kukhetho lolu.

UMnu. Msongelwa Ndlovu, isikhulumeli sebandla leZapu, uthi bafunde okunengi ngokhetho lolu lobanje benganzanga kahle ezigabeni ezinengi.

Ibandla leMDC-T, elikhokhelwa nguMnu. Douglas Mwonzora, beliswela abantu abalivotelayo kwezinye indawo obekulinde amalunga alo lezinye. UMnu. Witness Dube, obona ngokwethulwa kwemibiko kubandla leli, uthi bazakhuluma kabanzi ngokhetho lolu kusasa.

Ingcwethi kwezombusazwe ezimelyo, uMnu. Pride Mkono, uthi kunengi okuvezwe lukhetho lolu.

UDube uphinde wathi sebexotshisa amanye amalunga ezigabeni ezitshiyeneyo njengalokhu okwenze kwaba lokhetho lwama by-elections.

Okuphanyekwe phandle kwendawo zokuvotela kukhetho lwabazamela izigaba ezitshiyeneyo edale lephalamende, kuveza ukuba ibandla leZanu PF linqobe eMberengwa South, Murewa South, Chivi South, Tsholotsho, Mwenezi East lase Gokwe Central. Ibandla leCCC linqobe endaweni ezifana leGlen Norah, Glenview North, Highfields West leEast, Kambuzuma, Kuwadzana East, St. Mary’s, Mufakaose, Harare Central, Harare East leHatfield.

Linqobe njalo eDangamvura, Marondera, Mkoba, Kwekwe, Mbizo, Pumula leNkulumane. Kube lempumela efanayo kukhetho lwamakhansili.

Facebook Forum

XS
SM
MD
LG