amalinks wokungena

Breaking News

UBiden Uthi Uhulumende Wakhe Kafuni Ukugenqula uVladmir Putin


UMongameli Joseph Biden wakwele Melika.

UMongameli Joseph Biden uthi uhulumende wakhe kathathanga isinqumo sokuthi kususwe uhulumende kaMnu. Vladmir Putin esikhundleni.

UBiden utshele intathalizindaba eWhite House ngoMvulo ukuba akwethula kwele Poland ukuthi uPutin kafanelanga abesesikhundleni kwakungumbono wakhe hatshi isiqumo sikahulumende.

Ezinye ingcwethi zombusazwe zisola kakhulu okwethulwe nguMongameli Joseph Biden wakwele Melika, okuthiwa ulahle umlomo ngokuthi uPutin, kumele asuke esikhundleni ngenxa yokubulala abantu mahlayana kwele Ukraine okulempi eyesabekayo.

Kulabanye njalo abathi uBiden ukhulume okufiswa ngele Melika.

UBiden kubikwa ukuba walahla umlomo esanda kubona iziphepheli ezidabuka kwele Ukraine ezihlala kwele Poland.

Ababehamba loBiden bathi kwamzwisa ubuhlungu ukubona abantu abanengi bebuthene enkundleni yemidlalo ngenxa yempi kwele Ukraine.

UMnu. Rejoice Ngwenya, ingcwethi kwezombusazwe, uthi uBiden wethula amazwi la ngoba wayethukuthele.

UNgwenya uthi lokhu akusoze kuguqule ubudlelwano bamazwe la ahlala ethobelene.

UMnu. Ngqabutho Mabhena usibalukhulu webandla leZimbabwe Communist Party, uthi eleMelika livele lilenjongo yokugenqula uhulumende wakwele Russia.

Uthi okwenziwa ngele Melika akufani lalokhu elikwenza eZimbabwe.

IReuters ibika ukuba eleRussia selibulele abantu abedlula inkulungwane – 1,200 kwele Ukraine lapho elibhobha khona ngamandla emadolobheni atshiyeneyo. Inhlanganiso yeUnited Nations ithi sokulabantu abafika phose izigidi ezine – 3,8 million asebebaleke kwele Ukraine bayaphephela kwamanye amazwe.

Facebook Forum

XS
SM
MD
LG