amalinks wokungena

Breaking News

I-Amnesty International Isola uHulumende weZimbabwe Ngokwephula Amalungelo Oluntu


AMNESTY INTERNATIONAL

Inhlanganiso eyeAmnesty International ithi kwephulwe amalungelo oluntu ngendlela eyesabekayo eZimbabwe ngomnyaka ophelileyo oka2021.

Esethula lumbiko eJohannesburg emhlanganweni wabezindaba izolo, unobhala jikelele wenhlanganiso yeAmnesty International unkosikazi Agnes Callamard uchaze u2021 njengomnyaka wokwephulwa kwamalungelo oluntu, amalungelo ezempilakahle, amalungelo emfundo lezinto eziqakathekileyo empilweni ezifana lokudla, amanzi lendlela zokuziphilisa. Uthi amazwe asathuthukayo yiwo athwale amagabha avuzayo ngesikhathi la anothileyo egodla imithi yokuzivikela emkhuhlaneni wecoronavirus.

“Sifuna omongameli bamazwe eAfrica labo basukume babeyingxenye yokulawula izinto ezenzeka emhlabeni jikelele hatshi ukuba ngomalandela.”

Lumbiko uthi uhulumende weZimbabwe wephule amalungelo oluntu kakhulu phakathi kwalonyaka. Uthi kubelokucindezelwa kwelungelo lokwethula imibono okugoqela ukujeziswa kwepholisa le Mount Darwin umnumnzana Spenser Chiteera ngokuveza usekelo lwakhe kumkhokheli weCitizens Coalition for Change umnumnzana Nelson Chamisa. Uthi abanye babotshiwe ngoba kuthiwa bathethisa loba ukweyisa umongameli Emmerson Mnangagwa.

Umqondisi enhlanganisweni ye Amnesty International ezansi yezwekazi leAfrica unkosikazi Muleya Mwananyanda uthi okunye okubakhathazileyo ngumthetho obunjwayo ohlose ukucindezela ilungelo lemisebenzi yenhlanganiso ezizimeleyo lezilwela amalungelo kazulu.

“Sikhuthaza uhulumende weZimbabwe ukuthi ahloniphe ilungelo lokwethula imibono lokuthi abantu babe ngamalunga enhlanganiso abazifunayo.”

Ngokutsho kwalo umbiko kulentathelizindaba ezilitshumi lanhlanu ezibotshiweyo eZimbabwe ngo 2021 kugoqela uGilbert Munetsi owabotshelwa ukuhamba ngesikhathi esingavunyelwayo kukanti yena wayevela emsebenzini.

Ukubotshwa mahlayana kwabantu eZimbabwe ngenye yezinto esolwa yinhlanganiso yeAmnesty International. Ithi okunengi kwakusenziwa kuvikwa ngomthetho wokwenqabela icoronavirus njengokubotshwa kwabesifazana ababekuMDC Alliance unkosazana Cecillia Chinembiri lo Joanah Mamombe abacine besiyavalelwa kungelazizatho ezisemthethweni.

Amanye amalungelo ephuliweyo aqoqela ilungelo lokubuthana kwabantu lelungelo lezindlu elephulwe ngesikhathi abantu bedilizelwa izindlu.

Okhokhela iAmnesty International kweleSouth Africa unkosazana Shenilla Mohamed uthi ngitsho leSouth Africa imbala yaba lezehlakalo ezinengi zokwephulwa kwamalungelo oluntu.

“Sithole ukuthi izigidi zabantu bezingelamanzi kanye lezambudzi ezingasoke zabathelela imikhuhlane.”

Linhlanganiso ithi izehlakalo zika2021 zikhombisa ukuthi ohulumende abathenjwa ngakho ikhuthaza abantu emhlabeni jikelele kugoqela inhlanganiso ezilwela amalungelo oluntu lentathelizindaba ukuthi basukume bavikele amalungelo omuntu wonke emhlabeni.

Udaba lokwephulwa kwamalungelo oluntu eZimbabwe siluphiwa nguThuso Khumalo
please wait

No media source currently available

0:00 0:03:55 0:00

Facebook Forum

XS
SM
MD
LG