Ibutho lwakwele Russia libhomba ngamandla edolobheni elikhulu lakwele Ukraine loba uhulumende kaMnu. Vladmir Putin esithi usesusa ibutho duzane leKyiv.
UPutin ubike izolo ukuba uzasusa ibutho lakhe duzane ledolobheni leli ukwenzela ukuba ahlasele kwenzinye indawo kwele Ukraine.
IReuters ibika ukuba uMongameli Joseph Biden wakwele Melika, umkhokheli weBhilithane uMnu. Boris Johnson lowayengumkhokheli welizwe leli uMnu. David Cameron labanye, bathi eleRussia kalithenjwa ngakho bazabona ngokuzakwenziwa nguPutin hatshi ukukholwa ngenhliziyo yonke ukuba usesusa ibutho lakhe duzane leKyiv.
Ibutho lakwele Russia okwamanje libhomba ngama missiles eKyiv, Chernihiv, Mariupol lamanye amadolobho. Inhlanganiso yamazwe omhlaba wonke jikelele eyeUnited Nations ibika ukuba sokulabantu abafika phose izigidi ezine – 3,8 million asebebaleke kwele Ukraine bayaphephela kwamanye amazwe ngenxa yempi le eyesabekayo.
Kusenjalo, eleRussia lithi abakavumelani lutho lele Ukraine kulandela imihlangano embalwa esiyenzwe yizithunywa zamazwe la ezikhulumisana ngokumiswa kwempi ekwele Ukraine.
I-Associated Press ibika ukuba uMnu. Dmitry Peskov, isikhulumeli sika Putin, uthi kunengi okukhulunywa yizithunywa zamazwe la ezikwele Turkey. EleUkraine kubikwa ukuba selikubeke sobala ukuthi kalifuni ukuba yingxenye yeNATO.
UPutin uhlasele ilizwe leli esithi lifuna ukungena kumanyano lo olwisana lelizwe lakhe.
UMnu. Nhlanhla Moses Ncube, okunhlanganiso yeFreedom Alliance, uthi akumangalisi okwenziwa nguPutin, olwisana kabuhlungu leleMelika.