amalinks wokungena

Breaking News

Isigebengu Sibulala Ugogo Elele eGwanda


Isigebengu sibulele ugogo elele eGwanda elokitshini leSpitzzkop.
Isigebengu sibulele ugogo elele eGwanda elokitshini leSpitzzkop.

Izakhamizi zeGwanda zithi amapholisa kumele abhode emalokitshini ebusuku kuze kuse ukuze alwisane lobugebengu osobubhahile kulelidolobho.Lokhu kulandela ukubulawa komunye ugogo elokitshini leSpitzkop ebusuku kuthange ngumuntu okucatshangelwa ukuthi lisela.

Uzulu waseGwanda ukhala ngokuthi kasabuquthi ubuthongo ngenxa yezigebengu esezivuke ubhova edolobheni leli kulezinsuku.

UNkosikazi Emelia Ncube oleminyaka efika phose amatshumi ayisikhombisa 68 ubhubhe ngemva kokutshaywa kakubi, ngesidindi sehloka ekhanda, kwathi umzukulu wakhe uAaron Zulu walimala kabuhlungu ekhanda ngemva kokuganyulwa njalo usesimeni esibi esibhedlela seUnited Bulawayo Hospitals.

UNkosikazi Beauty Dube ngomunye wemuli yomufi. Uthi umdeni udabukile ngempela.

"Sibuhlungu thina sidabukile kakhulu, abantu abathengisa amatamatisi bayagijinyiswa bathathelwe amatamatisi kodwa laba ababulala abantu vele akathathi action,lamhlanje sisele sizintandane zokucina elizweni esingaziyo ukuthi siyathi sikhala sikhale kubani ngoba nguye umama obesesimthembile."

UNkosikazi Siduduzile Masilela ongumhlali weSpitzkop kuWard 5 uthi kabasavikelekanga lalapho besezindlini.

"Thina njengabomama abahlala kuWard 5 sesihlalela evalweni ngoba nxa umuntu esenelisa ukuthi abuye agamule isivalo azengene angibulalele kutsho ukuthi ngifana lomuntu ophandla, nxa umuntu ezafika agamule isivalo aze abulale abantu kutsho ukuthi amapholisa ayabe engekho eduze isecurity yethu ibonakala sokulomonakalo akulama patrols ayeneleyo."

UMnu Edgar Ncube ugcizelele amazwi kaMasilela esithi izakhamizi sokumele ziphume lamaqhinga okuzivikela.

"Kuhleli kulama reports nsukuzonke yokuthi abantu bayangenelwa ezindlini abanye ngabatshontshelwa izimota amapholisa akwazi mhlophe lokhu okumele ukuthi ngabe ngesimo sakathesi ngabe kulamapholisa abhoda ubusuku bonke kodwa akwenzakali ngicabanga ukuthi thina njengezakhamizi ngabe siyazibumbela umphatho sizivikele kulobubugebengu."

UKhansila kaWard 5, uMnu. Gilbert Dube, uthi izakhamizi zihlukuluzekile ngalesisehlakalo.

"Abantu bahlukumezekile kakhulu ngalesisehlakalo ngoba kukhanya sekuvamile ukuthi abantu baganyulwe kukhona njalo osekuzanywa ukuthi kwenziwe iPolice Base ezitolo zeRed Cross ukuze amapholisa abeduzane lozulu ancede abantu lapho edingakala."

Isikhulumeli samapholisa eZansi yeMaNdebeleni, uNkosikazi Loveness Mangena, uthi basaluphenya loludaba njalo babophe umsolwa oyedwa.

Ubugebengu buya buqhela kulelidolobho mihla ngemihla.

Kuliviki ngoLwesibili, uMnu. Patuma Dhinji oweSpitzkop uvuke ekuseni wathola imota yakhe yohlobo lweHonda Fit itshontshiwe.

XS
SM
MD
LG