amalinks wokungena

Breaking News

EleUkraine Lihlasela Kwele Russia


EleUkraine kubikwa ukuba libhombe amatanka epetulo kwele Russia esabelweni seBelgorod.

EleRussia lithi ibutho lakwele Ukraine ngoLwesihlanu libhombe elizweni leli endaweni yokuthengisela amafutha ezimota lendizamtshina edolobheni leBelgorod lisebenzisa indizamtshina ezithwala imibhobho emikhulu.

I-Associated Press ibika ukuba eleRussia lithi lokhu kuzakwenza kube nzima ukuba kuqhubekele phambili inkulumo zokukhumisana umlotha eziqhutshwa kwele Turkey.

UMnu. Dmitry Peskov, isikhulumeli sika Mnu. Vladmir Putin, umkhokheli wakwele Russia, uthi ukubhomba okwenziwe ngele Ukraine kwele Russia kutsho ukuba izaqhubekela phambili impi le.

EleUkraine alikethuleli uzulu ukuba yilo kumbe hatshi elihlasele kwele Russia.

Lokhu kwenzakala ngesikhathi eleUkraine lizama ukuthwala izizalwane zalo ezisedolobheni leMariupol lapho eleRussia elihlasela khona ngamandla njalo eselibulele abantu abanengi labhidliza izindlu lezinye izakhiwo.

EleRussia libike ngeviki ephelileyo ukuba lizasusa ibutho duzane lesigodlo selizwe, iKyiv. Kodwa kukhanya libhomba izindlu zikazulu mahlayana njalo kaliyindawo.

Ibutho lakwele Ukraine libika ukuba selizibambe esidukwini e-Irpin lamanye amadolobho ayehluthunwe libutho lakwele Russia. IReuters ibika ukuba sokulabantu abedlula izigidi ezine – 4 million asebebalekele impi le bayaphephela kwamanye amazwe. Ibika njalo ukuba sokulabantu abanengi okumangalisayo abasuswe emizini yabo libutho lakwele Russia.

UMongameli Volodmyr Zelenskyy, othakazelela okwenziwa libutho lakhe elilabanye abantu abaleminyaka efika amatshumi ayisithupha - 60, izolo ususe esikhundleni ababili abakhokhela ibutho esithi bangabathengisi. Kachasisanga ukuba benzeni.

Ukuze sihlaziye okwenzakala kwele Ukraine, sixoxe loMnu. Ngqabutho Mabhena, unobhala jikelele webandla leZimbabwe Communist Party, othi kumele eleUkraine lilandele okufiswa ngele Russia.

UMabhena uthi akumelanga uhulumende kaZelenskyy adlelane lamazwe entshonalanga alwisana lele Russia.

Facebook Forum

XS
SM
MD
LG