Izakhamizi zeZansi yemaNdebeleni sezikhala ngendlala kulandela ukungani kuhle kwezulu okutshiye inengi lezilimo zitshile uzulu wasala engavunanga lutho lonyaka kungakho uzabulawa yindlala nxa uhulumende engagenelanga.
Izakhamizi esixoxe lazo zithi lonyaka ongalimanga lolimileyo bayafana nje ngoba engekho ozavuna kulandela ukungani kuhle kwezulu.
Omunye walabo abalime wangatholi lutho nguMnu. Gabriel Moyo oweMawane eGwanda South othi bayaludinga uncedo lokudla.
E-Insiza lakho bakhala ngendlala, nangu unkosikazi Matilda Dube oweVokola, othi kuyadingeka ukuthi lenhlanganiso zakwamanye amazwe zisize ngokudla.
UMnu Trymore Mpofu owePlumtree uthi umkhuba yokwabelana ukudla ngezombangazwe kumele uphele ngoba inengi lizabulawa yindlala lonyaka nxa ungaqhubeka.
UKhansila kaWard 2 eGwanda North UNkosikazi Zwelibanzi Mpofu laye uthi akubanga lesivuno eMatshetsheni kungakho kuyadingeka ukuthi uhulumende engeze inani labantu abaholiswa ukudla.
Amazwi kamaMpofu agcizelelwe ngukhansila kaWard 13 eGwanda South uMnu Miclas Ndlovu othi abanye sebephila ngokucela ukudla kulabo abahola okuvela kuhulumende.
Lanxa inengi lezakhamizi bezilimile lapho izulu liqala zithe sezikhangelele isivuno esihle umumo yomkhathi waguquka kwatshisa okudale ukutshabalala kwezilimo kwatshiya uzulu ebhekane lendlala enkulo.
