Kulesizalwane seZimbabwe esibulewe ngokukhandwa ngamatshe ngemva kwalokho satshiswa, yizizalwane zakwele South Africa ebezidinga abakwamanye amazwe abaselizweni ngokungekho emthethweni ngoLwesithathu ebusuku elokitshini leDiepsloot eJohannesburg.
Ikhosikazi likamuyi, uNomusa Tshuma, utshele iStudio 7 ukuthi lomuyi, uElvis Nyathi, bebezikwejisele komakhelwane bebukele imidlalo yokulingisa kumabona kude.
Besahleli bazwe ixuku lezizalwane zakwele South Africa ebeligijimisana labantu bokuza phandle obekuthiwa baselizweni okungekho emthethweni.
Ngaleso sikhathi baphume babaleka. Ngokuswelakala kwenhlanhla uNyathi lomngane wakhe babanjwa batshaywa kabuhlungu kusetshenziswa izigodo, amatshe lensimbi besetheswa umlandu wokuthi abala mapassport njalo bayizigebengu.
Ngemva kwalokho baze laye uNyathi endlini bafuza indlu yonke bethi badinga umbhobho wakhe bawuswela ngoba engelawo, babuza ipassport yakhe bayiswela qede lapho batshaya ikhosikazi lakhe bamthathela imali bahamba loNyathi bafika bamkhanda ngamatshe bamtshisa waze wafa.
Umfelokazi uthi bazwa ubuhlungu obukhulu ngokwehlele uNyathi.
Umfowabo wokufi, uMnu. Busani Ncube, uthi okubazwisa ubuhlungu yikuthi uNyathi ubeyindoda elungileyo engayazi lakancane impilo yokuganga.
Besekula malanga amabili izakhamizi zeDiepsloot zitshengisela zithi abokuza ababuyele kibo.
Umphathintambo wogatsha lwezamapholisa, uMnu. Bheki Cele, laye ofikileyo kuleli lokitshi kodwa wangayi ukuya khulumisa imuli kaNyathi, usole kakhulu ubugebenga lobu.
Kusenjalo, isiphathamandla sehofisi yomeli weZimbabwe kwele South Africa, uConsel General Melody Chaurura, uthi bethuswe kakhulu yikubulawa kuka Nyathi.
Imuli kaNyathi ithi isilungiselela ukuyamngcwaba ekhaya kodwa isadinga usizo lwemali ngoba ubesebenza amalanga amalutshwane engelaye umasingcwabisane.