Umbala olithanga usudale inkulumo edale lephalamende lapho okungasavunyelwa amalunga ebandla leCitizens Coalition for Change (CCC) ukuba begqoke impahla ezilombala lo.
Bekuxokozela edale leli izolo ngesikhathi amaluga eCCC, asanda kukhethwa nguzulu kukhetho lwama by-elections, abafike edale leHouse of Assembly bebophe amathayi alithanga njalo abesifazana belezembatho ezilombala olithanga.
Bangene ngenkani kuleyo ndawo ngemva kokuvinjwa ngababona ngezokuvikela amalunga edale lephalamende.
Usomlomo wedale leHouse of Assembly, uMnu. Jacob Mudenda, watshela amalunga amatsha awebandla leCCC ukuba engagqoki izembatho ezilombala webandla leli edale lephalamende. Imithetho yedale lephalamende ikubeka sobala ukuba amalunga alo angamadoda akhangelelwe ukuba egqoke amasudu kuthi abesifazana bayavunyelwa ukugqoka izembatho eziveza amasiko abo.
Imithetho le kayikubeki sobala ngokugqoka amathayi lezembatho ezihambelana lemibala esetshenziswa ngamabandla.
Akuvunyelwa ukuba ilunga ledale lephalamende ligqoke okulemifanekiso eveza ukuba umuntu usekela liphi ibandla. Kambe kutshoni lokhu okwehlele amalunga ebandla leCCC?
Ukuze sihlaziye udaba lolu sixoxe loMnu. Kucaca Phulu, omele iNkulumane edale lephalamende ekubandla leCCC, othi uMudenda wenze okusengqondweni yakhe hatshi ukulandela umthetho wedale lephalamende oweStanding Rules and Orders.
Kodwa uMnu. Joseph Tshuma, owake wamela iPelandaba Mpopoma ekubandla leZanu PF, uthi kumele ibandla lika Chamisa lilandele okwethulwe lidale lephalamende.