Imuli kamuyi uElvis Nyathi, obulewe ngokukhandwa ngamatshe lokutshiswa kwele South Africa, ithi amalungiselelo okuyangcwatshwa kwakhe ekhaya koBulawayo asekusibanga esiphezulu.
UMnu. Mphathisi Ndlovu, ongumzala kamuyi uNyathi, utshele iStudio 7 ukuthi sebesenza amalungiselelo okucina andubana balubhekise ekhaya. Amalunga emuli abebuthene endaweni ezitshiyeneyo egoli namuhla kuqoqwa imali kanye lokulungisa uhambo. UNdlovu uthi ihofisi yomeli weZimbabwe kwele South Africa ibaxhumanise lenkampani yemingcwabo, iZororo Phumulani, esihle yathembisa ukuthwala umngcwabo wonke kungelanhlawulo. Kodwa-ke uNdlovu uthi lokhu beludinga olunye usizo.
“Sibona engathi inumber yabantu abafuna ukuhamba banengi ngoba lento iye yathinta abantu abanengi in all parts of Zimbabwe and other countries and continents. So, if besingathola amabhasi ukuze abantu abafuna ukuhamba imali zingekho abangene kulawo mabhasi sihambe siyefihla omunye wethu.”
UNdlovu uthi njengemuli basesephakathi kokuqoqa ilanga okuzaqhutshwa ngayo umhlangano wenduduzo kamuyi. Lobanje bekhangelele ukuthi bazalubhekisa ekhaya kuyonale iviki, uthi ilanga lohambo alikaziwa.
Umfowabo kamuyi, uMnu. Godknows Nyathi, uthi ikhosikazi likamuyi uNomsa Tshuma, ulokhu ephakathi kobuhlungu obukhulu ngalesi sehlakalo.“Usisi ukhathazekile kakhulu ngalokho okumehleleyo. Uyehluleka lokukhuluma ngoba umufi ubelabantwana abayifour. Abantwana bangena isikolo manje ngoba ubaba wabantwana esetshonile manje asikwazi ukuthi abantwana bazoba yini.”
Umgciningcebo webandla leZAPU uMnu. Future Msebele, laye obekhona kumihlangano yalamhlanje, uthi imfa kaNyathi ithinte zonke izizalwane zeZimbabwe kwele South Africa.
“Yebo akusibo bodwa abafelweyo sonke sifelwe. SiyiZimbabwe sonke sifelwe. SinguZapu siyadana kakhulu ukuthi umuntu engafa ngale indlela.”
Imuli ithi imilayezo ebivela kunhlelo zokuxhumana isithi lamhlanje lilanga lomthandazo wenduduzo kamuyi bekungasiqiniso ngakho uzulu kufuze alinde isimemezelo semuli ngaloludaba.
Imuli ikhuthaza umphakathi ukuthi bonke abafuna ukusiza kumbe ukuqoqela imuli kamuyi usizo baqale bethintane lemuli ukuze kuhleleke konke. Kusenjalo, amapholisa athi obulele uNyathi ulokhu engakatholakali lalamhlanje.