amalinks wokungena

Breaking News

Sebesesaba Ukuhlala eDiepsloot Abakwamanye Amazwe Ngemva Kokubulawa KukaMnu. Elvis Nyathi


Izihlobo zikamuyi uElvis Nyathi obulewe eDiepsloot zilungiselela umngcwabo eZimbabwe.
Izihlobo zikamuyi uElvis Nyathi obulewe eDiepsloot zilungiselela umngcwabo eZimbabwe.

AbeAmnesty International bathi ukubulawa ngokukhandwa ngamatshe lokutshiswa kwesizalwane seZimbabwe umnumnzana Elvis Nyathi ngesinye sezehlakalo ezinengi ezenziwa ngamaqembu aphehla inzondo yokucwasana ngobuzwe kweleSouth Africa.

Inhlanganiso ebona ngokulondolozwa kwamalungelo oluntu eye Amnesty International ithi izizalwane zakwamanye amazwe ezihlala eDiepsloot ikakhulu ezeZimbabwe zithi sezifuna ukusuka elokitshini leli ngokwesabela ukuthi okwenzeke kumuyi uElvis Nyathi kungenzeka lakubo.

Umqondisi wale inhlanganiso kweleSouth Africa unkosazana Shenilla Mohamed, utshele iStudio 7 ukuthi inhlanganiso yakhe ikhathazekile kakhulu ngokuvikeleka kwabakwamanye amazwe abahlala eDiepsloot.

“Kufanele amapholisa abophe abantu abahamba bengena ezindlini bezingela izizalwane zakwamanye amazwe.”

Amapholisa athi uNyathi engakabulawa bese kubulewe izizalwane zakweleSouth Africa ezinhlanu okuyizimfa ezakweleSouth Africa kuleli lokitshi ezithi zibangelwe ngabantu bokuza loba bungekho ubufakazi balokho.

Unkosazana Mohamed uthi zonke lezi izimfa kugoqela lekaNyathi bezingasoke zenzeke aluba amapholisa abesenza umsebenzi wawo lohulumende elalela izikhalazo zomphakathi ngobugebenga obenzeka elokitshini leDiepsloot.

Ezinye zezikhalazo zalabo asebefuna ukuthutha eDiepsloot babuyele kubo abakhulume eAmnesty International zigoqela ukuthi bayethuselwa lokuhlukunyezwa mihlayonke ngamaqembu aphehla ukucwasana ngobuzwe kanye lamapholisa.

Isizalwane seZimbabwe umnumnzana Greatman Mkhwebu utshele iStudio 7 ukuthi sebephila ngomusa wenkosi kweleSouth Africa.

“Lathi esihlala kwamanye amalokitshi vele sihlalele evalweni ngoba singazi ukuthi sizahlaselwa nini ngoba eqinisweni abantu baseSouth Africa abasasifuni either ulamaphepha kumbe awulamaphepha. Usungahlaselwanje ukuthi ulento zakho usebenza ngamandla akho uzitholele into zakho ezinhle ubusuhlaselelwa khonalokho njengalokho esibone kusenzakala eDiepsloot lowana umuntu ebulawelwa into angazange ayenze just because ulempahla ezinhle uyasebenza usecatshangelwa ukuthi uyatshontsha.”

Obona ngokuqoqwa kwenhlelo kweyinye njalo inhlanganiso ebona ngokulondolozwa kwamalungelo oluntu eyeFoundation for Human Right, uNkosikazi Sarah Motha uthi inhlanganiso yakhe isithole izicelo ezivela kwabakwamanye amazwe abadinga usizo lokusuka eDiepsloot babuyele kubo.

“Sikhuthaza inhlanganiso ezipha uncedo ukuthi zize zizonceda abakwamanye amazwe laba abafuna ukubuyela kubo.”

Kusenjalo imizamo yokukhulumisana lehofisi yomeli weZimbabwe kweleSouth Africa ngodaba lokuthi bakhona yini asebethintane lale ihofisi bedinga usizo lokubuyela ekhaya ibingakaphumeleli.

Umeli weZimbabwe uAmbassador David Hamadziripi utshele iStudio 7 ukuthi usanda vela phandle kwelizwe ngakho usadinga isikhathi sokubuzisisa iziphathamandla zehofisi yakhe ngaloludaba.

Kusenjalo inkonzo yesikhumbuzo sikaNyathi izaqhutshwa kusasa eHilbrow Theatre elokitshini le Hilbrow eJohannesburg kusukela ngo 3 o’clock kusiyatshaya u6:30 ntambama.

Banengi kakhulu abakwamanye amazwe abaseSouth Africa osekubangele ukuqhamuka kwempi yombango wemisebenzi phakathi kwabo lezizalwane zakweleSouth Africa.

Udaba lwabeZimbabwe abahlala eDiepsloot assebesabela impilo yabo siluphiwa nguThuso Khumalo
please wait

No media source currently available

0:00 0:03:30 0:00
XS
SM
MD
LG