amalinks wokungena

Breaking News

Kuvinjwa Omele iZimbabwe Kwele South Africa Ukuba Engethuli Amazwi Kahulumende Emthandazweni Wokuvalelisa uElvis Nyathi


The body of slain Elvis Nyathi at a memorial service in Johannesburg, South Africa.

Izizalwane zeZimbabwe ebezisemthandazweni wesikhumbuzo sikamuyi uElvis Nyathi, obulewe ngokutshiswa kwele South Africa, zalile ukuthi umeli weZimbabwe, uMnu. David Hamadziripi, ekhulume kulo umbuthano.

Lumthandazo uqale ngabebebuthene laba behlabela ingoma ezincoma umuyi uNyathi. Kodwa-ke kuthe ngokubizwa kuka Hamadziripi ukuthi akhulume kuhle kwaqhamuka ingxabangxoza abantu besala ukuthi akhulume.

Abebesala bebesithi nguhulumende weZimbabwe owenze uNyathi waze wazofela kwele South Africa ngokwehluleka ukubusa kuhle ilizwe.

Kodwa ngaphambi kwalesi sehlakalo umnumnzana Hamadziripi utshele iStudio 7 ukuthi uhulumedne weZimbabwe udabuke kakhulu ngokubulawa kuka Nyathi.

Izizalwane zeZimbabwe ebezibuthene enkonzweni yomthandazo wesikhumbuzo sikamuyi uNyathi, zikhulelwe lusizi lenyembezi ngesikhathi isidumbu sikamuyi singena eHilbrow Theatre eJohannesburg ukuze bambone okokucina.

UMnu. Velempini Ndlovu, isikhulumeloi semuli kamuyi, uthi ukubulawa kuka Nyathi kubatshiye bephuke kakhulu emoyeni njalo belemibuzo okwedlula impendulo.

UMnu. Bornman Khumalo, okhulumele izizalwane zeZimbabwe kwele South Africa, utshele abebebuthene laba ukuthi ukubulawa kuka Nyathi ngesihluku esikhulu engelacala sekutshiye inengi labe Zimbabwe sebesesaba ukuphila kwele South Africa.

Isizalwane seSouth Africa, Umnu. Peter Moshosho, uthe njengabantu beSouth Africa bacela uxolo.

Kube yizililo eziphindwe kabili ndawo yonke ngesikhathi umphakathi uphiwa ithuba lokubona lokuvalelisa isidumbu sikamuyi.

Ngeviki ephelileyo uNyathi lomkakhe unkosazana Nomusa Tshuma bebezibukelele imidlalo yokulingisa kumabona kude komakhelwana wabo elokitshini leDiepsloot lapho abebehlala khona.

Zukuzuku bezwa abantu behlaba umkhosi phandle begijinyiswa liqembu lezizalwane zakwele South Africa ebelizingela abaselizweni ngokungekho emthethweni lezigebenga.

UNyathi laye waphuma wabaleka kodwa bambamba, bamkhanda ngamatshe, bamtshisa lobanje basebebutholile ubufakazi bokuthi akayisiso sigebenga.

Inengi lithi imfa kaNyathi ibangelwe ngamaqembu asehlume indawana zonke zelizwe ekhankasela ukuthi abaselizweni ngokungekho emthethweni baxotshwe.

Ngemva komthandawo wesikhumbuzo umzimba kamuyi uthwalelwe lapho atshiselwa khona elokitshini leDiepsloot qede lapho ithimba eliwuphelekezelayo langena indlela belubhekise koBulawayo lapho azangcwatshwa khona ngoMgqibelo.

Uhulumende weZimbabwe uphe uNyathi inhlonipho yomngcwabo oxhaswa nguhulumende.

Facebook Forum

XS
SM
MD
LG