amalinks wokungena

Breaking News

Ibandla leMthwakazi Republic Party Lithi uMnangagwa Akholise Labanye Bakhe eBF Ngosuku Lokunanza Uzibuse


UMongameli Emmerson Mnangagwa uthakazelela uzibuse enkundleni yeNational Sports Stadium, Harare, April, 18, 2018.

Kulamabandla aphikisayo, anxuswe nguhulumende, athi kawasoze ahambe enkundleni yemidlalo eBarbourfields Stadium kusasa ukuyathakazelela uzibuse.

Amabandla la athi abantu bancindizelwe nguhulumende kaMongameli Emmerson Mnangagwa ngakho-ke akulasizatho sokuthakazelela uzibuse.

EleZimbabwe lifikisa iminyaka engamatshumi amane lambili – 42 kazibuse.

Umkhokheli webandla leMthwakazi Republic Party, uMnu. Mqondisi Moyo, uthi akutsho lutho ukunxuswa kwebandla lakhe nguhulumende kaMnangagwa.

UMoyo uphinde wathi kunengi okuzondwa nguzulu okwenziwa nguMnangagwa labanye bakhe ilizwe lisanda ukuthola uzibuse.

Kodwa abasekela ibandla leZanu PF bathi kunengi okuhle okwenziwe nguhulumende webandla leli kusukela ilizwe lithola uzibuse. UMnu. Joseph Tshuma, owake wamela iPelandaba/Mpopoma edale lephalamende ekubandla leZanu PF, uthi kulozibuse ogcweleyo elizweni.

Bayakhala abantu elizweni lonke jikelele ngohulumende kaMnangagwa. UMnu. Thembelani Moyo, ohlala eKwarai esigabeni seLupane esabelweni seMatabeleland North, uthi kalusakhayi usuku lukazibuse eZimbabwe.

UMoyo uchothoza okwenziwa nguhulumende kaMnangagwa.

Lokhu kusekelwa nguMnu. Buster Magwizi, okunhlanganiso yeZIPRA Veterans Association.

UMnu. Msongelwa Ndlovu, isikhulumeli sebandla leZapu, ulombono ofanayo.

UNdlovu uthi abantu badonsa nzima ngenxa yebandla elibusayo.

Omunye njalo ochothoza uhulumende kaMnangagwa nguMnu. Kucaca Phulu, othi ukubulawa kuka Elvis Nyathi yizizalwane zakwele South Africa kuveza ukuba abantu bayahlupheka eZimbabwe.

UPhulu uphinde wathi kumele abantu bezikhulule.

Kukhangelelwe ukuba kuzakwenziwa umkhosi omkhulu wokunanza usuku lukazibuse kusasa koBulawayo lapho uMnangagwa azakwethula khona umbiko wakhe oqakathekileyo.

Facebook Forum

XS
SM
MD
LG