amalinks wokungena

Breaking News

Uzulu Uncoma AbeCCC Ngokuphatheka Ekunanzeni i-Independence Day Lonyaka


Isikhulumeli seCCC, uNkosazana Fadzai Mahere utshele intathelizindaba ukuba abebandla lakhe bakubone kufanele baphatheke kulomkhosi ngoba ungowelizwe lonke njalo ungasi webandla linye loba umuntu oyedwa.

Itshayelwe ihlombe inkokheli yebandla eliphikisayo ele Citizens Coalition for Change - CCC, ngenyathelo lokumanyana lozulu elizweni jikelele ekunanzeni ilanga likazibuse, besithi kuyinto elungileyo abayenzileyo njengoba lolu kulusuku lomuntu wonke hatshi ibandla linye lezombusazwe.

Isikhulumeli seCCC, uNkosazana Fadzai Mahere utshele intathelizindaba ukuba abebandla lakhe bakubone kufanele baphatheke kulomkhosi ngoba ungowelizwe lonke njalo ungasi webandla linye loba umuntu oyedwa.

Fadzayi Mahere of the Citizens Coalition for Change
Fadzayi Mahere of the Citizens Coalition for Change

Enye ingcwethi kwezombusazwe umnumzana Mlindelwa Mancitshana, uthi kulungile lokho okutshiwo yinkokheli yeCCC ukuthi amalunga abo aphatheke lawo kulomkhosi wokuthakazelela usuku lukazibuse. U-Mancitshana uthi le kuyindlela yokutshengisa abantu ukuthi uzibuse akusiwo webandla elilodwa, uzibuse akusiwo weZanu kuphela, ngowomuntu wonke jikelele ngoba umuntu wonke nanku waphatheka ekumletheni.

“Ngeke abantu bakhalale kumbe bazonde ilanga leli ngenxa yezigilamkhuba kumbe abantu asebesona bephambanisa ibizo lelizwe. Konke lokhu kumele kube yinto abantu abangayitshayi indiva, abangayithathi kube yinto emangalisayo ngoba ilanga leli lalamhlanje, u-18 April lilanga likazibuse okumele linanzwe, lihlonitshwe nguye wonke umuntu ofuna inkululeko yakhe kumbe ohlonipha inkululeko eyalethwa ngamaqhawe ngesikhathi sakhona.”

Enye njalo ingcwethi kwezombusazwe unkosazana Abigail Mupambi uthi osekusenziwa ngabeCCC lomkhokheli walo kuyisibonelo sokuba sekusobala ukuthi sebeqakathekisa ilizwe lezizalwane zalo.

“Kusitshengisela ukuthi mhlawumbe ama-Political leaders ethu sebazafika esikhathini lapho abayabe sebezwisisa khona ukuthi i-Zimbabwe iqakathekile ukwedlula ama-Political Parties. Uzananzelela ukuthi sesilesikhathi eside kakhulu kusukela isikhathi esika former President, the late ubaba uMugabe up to lamuhlanje, abantu lokhe begijimisana, begijimisana ngezombuso, bephakathi kwsingathi khona khona yi-toxic politics. Lapho ke silahlekelwe yisikhathi esinengi, silahlekelwe ngama-ideas amanengi, ngenxa ye-toxic politics.”

Esinye isiphathamandla seZanu Pf umnumzana Mabutho Moyo uthi okwenziwe ngabe CCC kulinyathelo elihle njengoba uzibuse engowomuntu wonke.

“Uzibuse kumele aselebrathwe ngumuntu wonke jikelele weZimbabwe singakhangeli umbala, singakhangeli umhlobo singakhangeli lebandla umuntu ayabe evela kilo. Ukuba khona kwabo kubonisa umoya wokubambanisa opromothwa ngumongameli wethu ubaba uMnangagwa le second republic. Akusafani lakudala babetholakala behoza leli langa, akusafani lakudala ukuthi babesithi khona vele ngeke bephatheke ngoba bona uzibuse abakamboni. Iqiniso yikuthi uzibuse ukhona eZimbabwe lapho ke kungumsebenzi wamaZimbabweans wonke nje ukuthi simjabulele uzibuse njalo simvikele ngoba siyazazi izitha lokhe ziqoqoda eZimbabwe zifuna ukuzothatha ilizwe.”

Kwasekelwa ngesinye isakhamuzi saseGwanda umnumzana Ndaniso Mpande, omunye wabaphatheke kumikhankaso yokulwela ilungelo loluntu.

“Ukuya kuNational event kumbe ngithi emcimbini wesizwe, ayisinto embi. Vele kuyinto enhle kakhulu njalo sonke sibone ukuthi ngabe siyahamba entweni lezi. Kuphela nje into eyenza ukuthi singayi khona, yikuthi khonangale kufika kube yinto yebandla njalo kufika kube ligceke lokuthethisana, uthole sekuthethiswa uzibani, kuthethiswa uzibani, kucutshungulwe uzibani, kuthiweni, kuthiweni, into ezingelani lomcimbi wona lowu. Ukuya khona akusiyona inkinga.”

Esinye isiphathamandla esiphatheke kwezokucubungula ezombusazwe enhlanganisweni ye Zimbabwe Democracy Institute - ZDI, umnumzana Bekezela Gumbo uthi liyancomeka inyathelo elithethwe nguChamisa lebandla lakhe.

“Ungabona i-Party kaChamisa isisanelisa kuya kumaNational Events, kutshengisa ukuthi sebeyi-serious political party ngoba noma ngubani ofuna ukuthatha umbuso, kumele etshengise not only abantu beZimbabwe kodwa etshengise i-state craft, public service, police lama war veterans wonke, lama community leaders kanye lamabutho wonke ukuthi umuntu lowo u-serious ngento ayenzayo. Siyavuma ukuthi i-Zanu eziyenzileyo ezimbi kodwa ma sikhangela emuva, kukhona okunye osekuyakhiwe, awungeke uphonguqalela from nowhere. ”

Isikhulumeli sebandla le People’s Democratic Party - PDP umnumzana Nqobizitha Khumalo uthi lokhu osekusenzakala yikuba sekulokuzwisisana kwezokuqakatheka kwezokuphatheka kwabamabandla kumikhosi yelizwe okugoqela olukazibuse.

“ Ngoba ulimi seluphansi sibili, akusela laka sibili, ukuhwabhelana, ukubhongelana, ukuphakamiselana uthuli, obe kukhona, hayi kakusekho sibili ngoba lamuhla ngibone ubaba uHwende ehlezi ndawonye loMadhuku belalele ubaba uMnangagwa ngathi bekungenzakali lokhu izolo ngoba abantu bebesithi ubaba uMadhuku njengomuntu okuPOLAD, ngumthengisi sibili, uMnangagwa akufuzanga ngikhulume laye. Njalo ubaba uHwende ngumuntu obelolaka kakhulu, engafuni ukuzwa ngendaba kaMnangagwa. Nguye obekhokhela abantu ukuthi bephume kuParliament nxa ubaba uMnangagwa engangena. ”

Eminyakeni yangemuva, abanengi bebesehluleka ukuphatheka kule kumikhosi yaloluhlobo ngoba ibithathwa njengeyeZanu Pf lapho abantu bebesiza begqoke impahla yebandla labo ikanti kulusuku lwelizwe lonke.
Lonyaka lumkhosi wenzelwe enkundleni ye Barbourfields koBulawayo, okwakuqala embalini yelizwe selokhu lathola uzibuse njalo unanzwa phansi kwendikimba ethi “ Zim@42-Leaving no one and no place behind.”

Udaba lwabeCCC abamanyane labanye lonyaka ukunanza i-Independence Day siluphiwa nguMavis Gama
please wait

No media source currently available

0:00 0:06:13 0:00

Facebook Forum

XS
SM
MD
LG