amalinks wokungena

Breaking News

Simbisa Brands: Abantu Lokhu Besenelisa Ukuthola Imali Yabo Kunkampani yeInnBucks Evinjwa yiReserve Bank of Zimbabwe


Abantu abasebenzisa inkampani yeInnBucks lokhu besenelisa ukuthola imali yabo loba isivinjwa nguhulumende.

lSimbisa Brands Limited namuhla yethule umbiko othi inkampani ephatha imali kazulu eyeInnBucks izaqhubekela phambili inika labo abalemali ebanjwe kuleyondawo loba ivalwe libhanga elikhulu lelizwe eleReserve Bank.

Inkampani le ithi isalungisa lebhanga leli okuhluphayo ukwenzela ukuba isibenze ngendlela efunwa yiRBZ.

Ibhanga elikhulu lelizwe eleReserve Bank of Zimbabwe, limise abakumsebenzi wemali abathathu lisithi ngoba ephule umthetho wokusetshenziswa kwemali yaphandle kwelizwe. Ingcwethi kwezomnotho zithi lokhu sekuzadala ukuthi amankampani akulumsebenzi amanengi ahlehlele emuva lanxa kungabe kulenzuzo engcono kulibhizimusi.

UMnu. Thabo Ndlovu, ingcwethi ecubungula ezomnotho, uthi inyathela elithethethwe yiRBZ lizadala inkinga ezinengi kwabakulumsebenzi kumbe abafisa ukungena kuwo.

UMnu. Sandile Dlodlo ofundisa ngokuqhutshwa kwezomnotho uthi ngokuthatha leli nyathelo uhulumende uzama ukuqondisa inkinga esezidalwa ngumkambo ongekho emthetweni eseziphazamisa umnotho welizwe.

"Uhulumende kakho consistent nxa sikhangela ama foreign currency dealings. Imbangala yalokhu yi impact ye parallel market, imali ezinengi ezisuka kumabhanga zihamba kubosiphatheleni. So, imali lezi nxa sezikubo Siphatheleni seziqala uku-influencer ukuthi intengo zihamba njani so khathesi uhulumende uzama ukuthi atshintshe ama policies azame uku-corrector idamage eyenziwa ngu-parallel market ku-economy yeZimbabwe.”

UNkosikazi Wendy Moyo, umhlali wakoBulawayo, uthi ukumiswa ngesiphangi phangi kwe-InnBucks kuyabethusa ngoba sebengavuka imali sezitshabalele emabhanga njengalokhu okwenzeka eminyakeni edlulileyo.

“Ukuvalwa okwesiphithiphithi kweBank le-InnBucks kithi ama-customers kuyasihlasimulisa umzimba ngoba kutsho loba yiphi ibhanga ingavalwa lemali zethu zihle zinyamalale, lokhu akukutsha eZimbabwe sikhuluma ngento esake sayiphila. Khathesi vele sisebenzisa i-plastic money, kunzima ukuthi ube lehard cash so ukuvalwa nje kweBank kuyasethusa, uhulumende kazame ukulungisa umnotho welizwe.”

Unkosikazi Sipho Mlalazi, omunye njalo oyisakhamuzi sakoBulawayo, uthi leli linyathelo elidanisayo elithethwe nguhulumende ngoba bebencedakala ngohlelo lolu.

Ibhanga leRBZ imise ukusebenza kogatsha lokuthumezela abanye imali olwenkampani yeSimbisa Brands, olwe Innbucks, leRolink Finance Limited kanye lebhanga leMetBank. Amankampani lawa etheswa icala lokwephula umthetho wokusetshenziswa kwemali yaphandle kwelizwe.

Ibhanga leli like libike ukuba ngoLwezi womnyaka odluleyo, i-InnBucks ike yaxwayiswa ukuba ilungise amaphepha ayo okusebenza ukuze ingaphambani lomthetho kodwa ke kuze kufike khathesi ibilokhe ingakwenzi lokhu.

Uzulu obesebenzisa i-InnBucks sephiwe amalanga angamatshumi amathathu (30) ukuba akhiphe imali zakhe ezikunkampani leyi.

Kuthi iRolink Finance Limited yona isijeziswe ngokuba kufanele ihlawule inkulungwane zamadola alikhulu lamatshumi amabili amadola eMelika (USD$120,000) loba elingana laleyo ngemali yakweleZimbabwe.

Ibhanga leMetBank lona limisiwe ekuthengeni loba ekuthengiseni imali yaphandle kwelizwe kanye lokuqhuba inhlelo ezelizweni leZimbabwe loba ezangaphandle kwelizwe eziphathelane lemali yamanye amazwe.

Konke lokhu kuvezwe ngusibalukhulu webhanga leReserve Bank of Zimbabwe, uMnu. John Panonetsa Mangudya, embikweni awethulele uzulu.

Facebook Forum

XS
SM
MD
LG