Umbukiso walonyaka oweZimbabwe International Trade Fair-ZITF 2022 uqale ngomkhlangano wabosomabhizimusi owe ZITF Business Conference ongenwe ngabasuke emazweni aphetsheya kolwandle, awezwekazi leAfrica lawaphakathi kwelizwe.
Imihlangano eyenziwa kulumbukiso ikhangelelwe ukuphumisa izivumelwano zamabhizimusi ezilakho ukuvuselela umnotho welizwe.
Umgcinisihlalo wenkampani yeZITF, uMnu Busisa Moyo uthi kulamankampani alitshumi lane asuka phandle kwelizwe aze elizweni lonyaka.
Umphathintambo wakoBulawayo uNkosikazi Judith Ncube uthi umbukiso oweZITF uzakhulisa amabhizimusi akuleli lobudlelwano lamanye amazwe.
“Sikhangele ukuba kubelebhizimusi elihle eZITF njalo koBulawayo sikhangelele ukuthola osomabhizimusi abazamanyana lamanye amankampani abantu bathole imisebenzi kuthi ezokwethekelelwa sakuleli idolobho lazo zithole abazasebenza labo bemanyene labekhansili”
Ohlaziya ezomnotho uMnu Zibusiso Mkhwananzi uthi umbikiso wamabhizimusi weZITF awusoke udale umahluko kwezamabhizimusi
“Akulalutho olisaphuma kumbukiso okhona ngoba ezweni akulamankampani alohlonzi asebenzayo kunzima ezomnotho azimanga kahle ezweni.”
Umqondisi weZimtrade uMnu Similo Nkala uthi bazobukisa besekela lamankampani asacathulayo ekuthengiseleni phandle kwelizwe.
“Sizobukisa lapha lonyaka sincedisa amankampani asacathulayo abo mama labatsha ukuze bathole amathuba okuthengisa impahla zabo phandle kwelizwe njalo sisabafundisa ngokuphatha amabhizimusi okulenzuzo”
Umbukiso walonyaka ogijima ngendikimba ethi “Rethink, Reimagine, Reinvent. Value Chains for Economic Development uqale NgolweSibili uyaze uyephelaNgoMgqibelo, mhlaka 30 Mabasa.
UMongameli Uhuru Kenyatta weleKenya obekhangelelwe ukuvula umbukiso weZITF walonyaka, kaseyi kubuya kulandela ukubhubha kuka Mnu Mwai Kibaki owayengumongameli weleKenya. Umongameli Emerson Mnangagwa nguye osekhangelelwe ukuvula okusemthethweni umbukiso walonyaka NgoLwesihlanu, Mhlaka 29 Mabasa.
Mhlaka 26 kusiya ku28 Mabasa ngamalanga ababukisayo okuzaba lemihlanganao ehlukeneyo egoqela iZITF Innovators Forum, ZITF Business Conference, iConnect Africa Symposium leDiplomats Forum. Kuthike kusukela Mhlaka 29 kusiya ku30 Mabasa iZITF 2022 besekuvulelwa uzulu.
