amalinks wokungena

Breaking News

Abongi Bakhuthaza Amakhansili Ukuba Beholise Izisebenzi Amadola eMelika


FILE: Abongi bathi uhulumende kumele abaholise idola leMelika. (Bathabile Masuku)

Abenhlanganiso elwela ilungelo labongi abasebenzela omanisipala eyeZimbabwe Urban and Rural Council Nurses Workers’ Union bakhuthaza abaqhatshi ukuba balandele okwenziwa nguhulumende, ohlawula ingxenye yeholo leziisebenzi ngedola leMelika.

Amalunga enhlanganiso le athi lokhu kunganceda ukwehlisa inhlupho ababhekane lazo.

Linkuthazo yethulwa ngesikhathi ilizwe lilungiselela ukunanza usuku lokuqakathekisa izisebenzi emhlabeni jikelele olwe International Workers’ Day ngeNsonto, mhlaka 1 Nkwenkwezi.

Umkhokheli wenhlanganiso le, uMnu. Simbarashe James Tafirenyika, uthi konke eZimbabwe sokubiza idola leMelika.

“Kunje, imali zama-rent zihlawuliswa ngama US Dollars, abathengisa ukudla besenza lokho ngama US Dollars. Ungaya ezitolo ezikhulu, uzathola ukuthi bona intengo yabo bayibeka ingehambelana leyedola emkambo omnyama. Lokhu kusuka kube nzima kuzisebenzi.”

Kwasekelwa ngenye ingcwethi kwezomnotho elizweni umnumzana Masimba Manyanya, owake wasebenza ebhanga elikhulu lelizwe eleReserve Bank of Zimbabwe.

“Ukukhangela nje emphakathini, ukuze umuntu uzwisise ukuthi abanye bethu baphila kanjani. Khona ukwanelisa ukuthola isinkwa nje loba ukuthola yona impuphu, isawudo, itshukela, sekunzima kakhulu.”

Unobhala jikelele enhlanganisweni elwela ilungelo lezisebenzi eye Zimbabwe Congress of Trade Unions, uMnu. Japhet Moyo, uthi inhlupho ezibhekane lezisebenzi ezihlala zikhala ngazo zingalungisiswa kuphela uma uhulumende osembusweni labezombusazwe bengazinikela ukulungisisa umnotho welizwe.

“Kungaba lula nje nxa singaphakamisa ezomnotho phakathi kwelizwe lakithi, kungaba lula sibili okumangalisayo. Imisebenzi kayitholakale eZimbabwe, ama opportunities katholakale eZimbabwe.”

Kunyanga ezisanda kwedlula, uhulumende uthi uzamile ukuba leyinye ingxenye yeholo yama allowances aseyitholisa izisebenzi ngedola leMelika. Kodwa zona zithi lokhu akweneli zikhala ngokuthi lokhu akusinto engenziwa okwesikhathi eside, ngoba lezi kuzimali ezilakho ukumiswa yiloba yisiphi isikhathi.

Abalwela amalungelo ezisebenzi elizweni jikelele bakhala ngokuthi iholo lezisebenzi zonke ezikuhulumende lakumankampani azimeleyo lokhe lincipha mihla ngemihla ngenxa yokukhuphuka kwentengo yento yonke elizweni okuqalisela ekuqongeni kwentengo yamafutha ezimotha.

Izisebenzi zikhalanje ngokuncipha kweholo ngaphambilini kokunanzwa kosuku lwezisebenzi emhlabeni jikelele olweInternational Labor Day. Lonyaka usuku lolu lunanzwa phansi kwendikimba ethi ‘United Workers for Social and Economic Advancement’.

Facebook Forum

XS
SM
MD
LG